फोंडा: फोंड्यातील जुन्या पुराण्या ज्या जलस्रोतावर एक काळ पिण्याच्या पाण्याची तहान भागत असे, ज्या पाण्यावर शेती-बागायती केली जायची त्या वारखंडे-फोंडा येथील हनुमान तीर्थ तळीच्या जतन आणि सौंदर्यीकरणाच्या कामाला मंगळवारी (ता.१) प्रारंभ झाला. फोंडा मतदारसंघाचे आमदार तथा राज्याचे कृषिमंत्री रवी नाईक यांच्या उपस्थितीत या कामाचा शुभारंभ करण्यात आला.

यावेळी फोंडा नगराध्यक्ष आनंद नाईक, नगरसेवक रूपक देसाई, कुर्टी - खांडेपार पंचसदस्य मनीष नाईक, हरेश नाईक, साजिदा सय्यद, निर्मल विश्‍वचे प्रदीप कामत, समाजकार्यकर्ते प्रमोद सावंत, गुलाब बोरकर, अनिल कोरडे, जलस्रोत खात्याचे साहाय्यक अभियंते शैलेश नाईक व स्थानिक नागरिक उपस्थित होते.

जलस्त्रोत खात्यातर्फे सुमारे ४७ लाख रुपये खर्चून हे काम केले जाणार आहे. त्यात तळीची स्वच्छता, गणपती विसर्जनासाठी एका बाजूला सोय, तळीच्या परिसराचे सौंदर्यीकरण तसेच इतर कामांचा समावेश आहे.

या तळीच्या बाजूलाच चौपदरी रस्ता उभारण्यात आला आहे, तरीही हा परिसर शांत आणि रमणीय असा आहे. आता सरकारकडून या परिसराचे सुशोभीकरण, तळीच्या संवर्धनाचे काम होणार आहे.