वाळपई: सत्तरी मुसळधार पावसामुळे जनजीवन विस्कळीत झाले. गेल्या दोन दिवसांपासून संततधार पडणाऱ्या पावसामुळे काही ठिकाणी रस्त्यांवर पाणी साचण्याचा प्रकार घडले. वाळपई फोंडा मार्गावरील सावर्शे येथे अजय पाटील यांच्या पेट्रोलपंपावर जवळील मुख्य रस्त्यावर भले मोठे आंब्याचे झाड सोमवारी सकाळी पावणे आठच्या दरम्यान उन्मळून पडले, त्यामुळे दोन तास वाहतूक खोळंबली. सुदैवाने कोणतीही दुर्घटना घडली नाही.

हा रस्ता मुख्य असून नेहमी या रस्त्यावर वाहनाची वर्दळ असते. मात्र ज्यावेळी झाड पडले त्यावेळी येणारी वाहने लांब असल्याने सुदैवाने कोणतीही जीवित हानी झाली नाही. मात्र दोन्ही बाजूने वाहनांच्या रांगा लागल्या.

दरम्यान, वाळपई अग्निशमन दलाला कळविल्यानंतर जवानांनी तातडीने घटनास्थळी धाव घेऊन मदत कार्य केले. दोन तासानंतर दुचाकींसाठी वाहतुकीस रस्ता खुला केला. सावर्शे येथील उपसरपंच रूपाली गावकर तसेच माजी पंच समीर बागी यांनी जेसीबी उपलब्ध करून दिली.

सुमारे चार तासांनंतर रस्ता पूर्ण मोकळा करण्यात आला. वाळपई अग्निशमन दलाचे अधिकारी संतोष गावस यांच्या मार्गदर्शनाखाली अरविंद देसाई, तुळशीदास झर्मेकर, एम.एस गावडे, के. एच. गावकर, जी.आर. देगवेकर, पी.एस. गावकर, रूपेश सालेलकर, आर. यु. गावकर आदींनी मदत कार्य केले.