Goa Police: दुचाकी व चारचाकी वाहने चालविणाऱ्या अल्पवयीन चालकांसाठी गेल्या दोन दिवसांपासून वाळपई पोलिसांनी खास मोहीम राबवून त्यांची धरपकड सुरू केली आहे. गुरुवारी मोहिमेच्या पहिल्याच दिवशी तब्बल 50 जणांवर कारवाई केल्यानंतर ही संख्या बऱ्याच प्रमाणात घटली. दुसऱ्या दिवशी मात्र एकही अल्पवयीन वाहनचालक रस्त्यावर फिरताना दिसला नाही. त्यामुळे पालक आणि अल्पवयीन मुलेही भानावर आली, अशी प्रतिक्रिया व्यक्त केली जात आहे.

गोवा राज्यामध्ये गेल्या काही दिवसांपासून अपघातांचे सत्र वाढू लागले आहे. विनापरवाना वाहने चालविणे व अल्पवयीन मुलांनी वाहने चालविण्याचे प्रकारही वाढीस लागल्यामुळे अपघातांत वाढ होऊ लागली आहे.

त्यामुळे मुख्यमंत्री डॉ. प्रमोद सावंत यांनी अल्पवयीन मुलांना पालकांनी वाहने चालवायला देऊ नयेत, अशी विनंती केली होती. तरीही राज्याच्या अनेक भागांत अल्पवयीन चालक वाहने चालवताना दिसत होते. त्यामुळे गुरुवारपासून ही मोहीम सुरू केली आहे. काल दिवसभर वाळपई शहराच्या अनेक भागांत पोलिसांची गस्त सुरू होती.

यापुढेही मोहीम सुरूच राहणार

वाळपई सरकारी रुग्णालयाच्या परिसरामध्ये हाती घेतलेल्या मोहिमेवेळी गुरुवारी पहिल्याच दिवशी तब्बल 50 अल्पवयीन चालकांवर कारवाई करण्यात आली. त्यांना दंडही ठोठावण्यात आला. मोटार वाहन कायद्यामध्ये केलेल्या बदलानुसार आता अल्पवयीनांच्या पालकांवरही गुन्हे दाखल करण्यात येणार आहेत.

शुक्रवारी वाळपई तसेच केरी चेक पोस्टजवळ पोलिसांची गस्त सुरू होती. मात्र, एकही अल्पवयीन चालक मिळाला नसल्याची माहिती पोलिसांनी दिली. वाळपई शहरात ही मोहीम अशीच सुरू राहाणार असल्याचे पोलिस अधिकाऱ्यांनी सांगितले.

उशिरा का होईना, पालक जागे

गुरुवारी वाळपईत अचानक सुरू झालेल्या कारवाईमुळे नागरिकांमध्ये खळबळ उडाली होती. त्यामुळे सरकारने जो निर्णय घेतला आहे तो योग्य असून यापुढे अल्पवयीन वाहनचालकांवर कारवाई होईल व गाड्या जप्त केल्या जातील, या कारणास्तव पालक व मुलांमध्ये भीती निर्माण झाली आहे. त्यामुळे काही प्रमाणात अपघातांना आळा बसेल. मात्र, पोलिसांनी ही मोहीम सुरूच ठेवावी, असे काहींचे मत आहे.