वाळपई: येथील सामाजिक आरोग्य केंद्रात फ्रॅक्चरवरील उपचारादरम्यान झालेल्या वैद्यकीय निष्काळजीपणामुळे ११ वर्षीय मुलाचा पाय कापावा लागल्याची धक्कादायक घटना उघडकीस आली आहे. या प्रकरणाची गंभीर दखल घेत आरोग्य खात्याने वैद्यकीय अधिकारी डॉ. यवंती गावडे यांना तत्काळ निलंबित केले आहे. आरोग्य विभागाचे संयुक्त सचिव डॉ. प्रणव भट यांनी निलंबन आदेश जारी केला.

मिळालेल्या माहितीनुसार, नगरगाव पंचायत क्षेत्रातील माळोली-सत्तरी येथील ११ वर्षीय मुलगा २७ एप्रिल रोजी खेळताना पडून जखमी झाला. त्याच्या पायाला फ्रॅक्चर झाल्याचे वाळपई सीएचसीतील एक्स-रे तपासणीत स्पष्ट झाले. त्यानंतर डॉक्टरांनी प्लास्टर करण्याचे निर्देश दिले आणि उपचारानंतर मुलाला घरी पाठविण्यात आले.

मात्र दुसऱ्याच दिवशी मुलाला तीव्र वेदना, अस्वस्थता आणि उलट्यांचा त्रास सुरू झाला. त्यामुळे कुटुंबीयांनी त्याला पुन्हा सीएचसीमध्ये आणले. तेथून पुढील उपचारासाठी गोमेकॉत हलविण्यात आले. विविध तपासण्या आणि शस्त्रक्रियांनंतरही स्थिती सुधारली नाही. अखेरीस १ मे रोजी मुलाचा गुडघ्याखालचा पाय कापावा लागला. मुलाच्या कुटुंबीयांनी प्राथमिक उपचारात गंभीर निष्काळजीपणा झाल्याचा आरोप केला आहे. जखम आणि रक्तस्त्राव असूनही योग्य उपचार न करता थेट प्लास्टर करून घरी पाठविण्यात आल्याचा दावा त्यांनी केला. वेळेत योग्य उपचार झाले असते तर मुलाचा पाय काढावा लागता नसता, असेही त्यांनी म्हटले आहे.

या घटनेची गंभीर दखल घेण्‍यात आलेली आहे. प्राथमिक उपचारात निष्काळजीपणा सिद्ध झाल्यास संबंधितांवर कठोर कारवाई केली जाईल.

- विश्वजीत राणे, आरोग्यमंत्री