मोरजी : पर्यावरणाचा समतोल राखण्यासाठी मूर्तिकार यांनी केवळ चिकण मातीचा वापर करून गणेश मूर्ती बनवाव्यात, असे आवाहन हस्तकला महामंडळाचे चेअरमन तथा पेडणे मतदारसंघाचे आमदार प्रवीण आर्लेकर यांनी गांधी तीर खारेबंद पेडणे येथील गणेश मूर्तिकार अरुण पालयेकर यांच्या चित्र शाळेला भेट दिल्यानंतर त्यांनी त्या ठिकाणी स्थानिक पत्रकारांकडे संवाद साधताना सांगितले.

यावेळी आमदार प्रवीण आर्लेकर यांनी सांगितले की, पर्यावरणाचे प्रत्येकाने रक्षण करावे. हल्ली मोठ्या प्रमाणात प्लास्टर ऑफ पॅरिसच्या मूर्ती बाजारात विकल्या जातात. मूर्तिकारांनी आणि ग्राहकांनी या प्लास्टर ऑफ पॅरिसच्या मूर्ती न घेता केवळ चिकण मातीचा वापर केलेल्या गणेश मूर्ती घ्याव्यात.

हस्त कलाकारांच्या ज्या-ज्या समस्या असतील, जे-जे प्रश्न असतील, ते प्रश्न सोडवण्यासाठी आपले प्रयत्न असणार आहेत. शिवाय अनुदानही वेळेवर मिळवण्यासाठी आपण सरकार दरबारी प्रयत्न करणार असल्याची ग्वाही आमदार प्रवीण आर्लेकर यांनी दिली.

गोव्याच्या पर्यायाने पेडणे तालुक्यात मोठ्या प्रमाणात हस्त कलाकार आहेत. याची जाणीव आपल्याला आहे; आणि या कलाकारांना स्वतंत्र व्यासपीठ उपलब्ध करून देण्यासाठी शिवाय त्यांच्या कलागुणांना वाव देण्यासाठी आपले प्रयत्न असणार आहेत. शिवाय योग्य ती मदत करण्यातही आपण पुढे असणार असल्याचे आमदार आर्लेकर यांनी सांगितले.