सावंतवाडीतील सोनुर्ली – रोणापाल येथे घनदाट जंगलात मूळ अमेरिकन वृद्ध महिला साखळदंडांनी बांधलेल्या अवस्थेत आढळून आली. प्रकृती ढासळलेल्या या महिलेला उपचारासाठी गोव्यात दाखल करण्यात आले आहे.

रविवारी दुपारी महिलेला बांबोळीतील वैद्यकीय महाविद्यालयाच्या रुग्णालयात हालविण्यात आले. महिलेसोबत घडलेल्या या अमानविय घटनेची गंभीर दखल अमेरिकन दूतावासाने घेतली आहे.

सोनुर्ली – रोणापाल येथील जंगलात साखळदंडांच्या मदतीने झाडाला लॉकने महिलेला बांधल्याचा धक्कादायक प्रकार उघडकीस आला. महिला मोठ्या किंचळत असताना एका गुराख्याच्या हा प्रकार निदर्शनास आला. पोलिसांच्या मदतीने ललिता कायी कुमार एस या अमेरिकन महिलेला उपचारासाठी रुग्णालयात दाखल करण्यात आले.

तीन दिवस उपाशीपोटी पावसात असलेल्या महिलेची प्रकृती ढासळल्याने तिला उपचारासाठी उपजिल्हा रुग्णालयात दाखल करण्यात आले. मात्र, प्रकृती अधिक बिकट झाल्याने तिला बांबोळी येथील रुग्णालयात दाखल करण्यात आले आहे.

तपासात महिलेजवळ मोबाईल आणि टॅब व 31 हजार रुपये रोख सापडले आहेत. पोलिस मोबाईच्या मदतीने अधिक तपास करण्याचा प्रयत्न करत आहेत.

अमेरिकन दुतावासाने घेतली दखल

अमेरिकन दुतावासाने या प्रकाराची गंभीर दखल घेतली असून, घटनेचा सखोल तपास करण्याची मागणी केली आहे. आंतरराष्ट्रीय स्तरावर प्रकरणाची दखल घेतल्याने पोलिसांनी तपासाची चक्रे जोमाने फिरविण्यास सुरुवात केली आहे.

घटनेचा तपास करण्यासाठी पोलिसांची एक टीम तमिळनाडू येथे तर दुसरी टीम गोव्यात रवाना करण्यात आली आहे. गोव्यात मोठ्या प्रमाणावर परदेशी पर्यटक येत असतात त्यामुळे गोव्यात देखील याचा तपास केला जाईल. तर महिला गेल्या दहा वर्षापासून तमिळनाडूत वास्तव्यास असल्याने तिथेही तपासाच्या दृष्टीने पोलिस दाखल झाले आहेत.