Jobs in Goa : ‘औद्योगिक विकास व कौशल्याची साथ’ या विषयावर राज्याच्या कौशल्य विकास खात्याने शुक्रवार 4 नोव्हेंबर रोजी जुने गोवे येथे खास कार्यशाळेचे आयोजन केले आहे. मुख्यमंत्री डॉ. प्रमोद सावंत प्रमुख पाहुणे म्‍हणून तर आयएएस अधिकारी सरप्रित सिंग गिल सन्माननीय अतिथी म्हणून उपस्‍थित राहणार आहेत, अशी माहिती या खात्याचे संचालक दीपक देसाई यांनी दिली.

गोव्यातील अप्रशिक्षित युवकांना कौशल्य प्रदान करण्यासाठी काही नामवंत औद्योगिक अस्‍थापनांशी करार करण्याचे ठरविले आहे. या कार्यशाळेत या उद्योगांच्या प्रतिनिधींना बोलावण्यात आल्याची माहिती देसाई यांनी दिली. कार्यशाळेत बेरोजगारांना रोजगाराच्‍या संधी देण्यासाठी योजना बनविली जाईल असे ते म्हणाले. गोव्यातील उद्योग सरकारला पूर्ण सहकार्य द्यायला तयार आहेत. प्रशिक्षित कर्मचारी सर्वांनाच हवे असतात. ते पुरविण्यासाठी सरकार सदैव प्रयत्नशील आहे. त्यासाठी भरती मेळावे, प्रशिक्षण शिबिरे आणि कार्यशाळा घेतल्या जात असल्याचे त्यांनी सांगितले.

गोव्यात शिक्षित युवक खूप आहेत, पण सगळेच प्रशिक्षित व कौशल्य असलेले असतील असे नाही. नोकरी मिळविण्यासाठीच कौशल्य प्राप्त करायला हवे असेही नाही. सरकार प्रशिक्षण द्यायला सदैव तयार आहे. केंद्राच्याही अनेक योजना आहेत. त्याचा लाभ प्रत्‍येक युवकाने घेतला पाहिजे, असे देसाई म्‍हणाले.

साखळी, पणजीत मार्गदर्शन कार्यक्रम

औद्योगिक क्षेत्रात महिलांनी आघाडी घ्यावी यासाठी 7 नोव्हेंबर रोजी साखळी रवींद्र भवनात महिलांसाठी खास कार्यक्रमाचे आयोजन करण्यात आले आहे. मुख्यमंत्री या कार्यक्रमात महिला उद्याजकांना मार्गदर्शन करतील. 8 नोव्हेंबर रोजी पाटो-पणजी येथील सांस्‍कृतिक भवनात महिला स्वंयसाहाय्‍य गटांना आमंत्रित करण्यात आले आहे. आयटीआयने निवडलेल्या ब्रँड ॲम्‍बेसेडरना या कार्यक्रमात मार्गदर्शन करण्यासाठी आमंत्रित करण्यात आल्याची माहिती देसाई यांनी दिली.