Body Found in Anjune Dam : अंजुणे धरणात अज्ञात व्यक्तीचा मृतदेह आढळल्याने एकच खळबळ उडाली आहे. आज सोमवारी सकाळी केरी सत्तरीतील अंजुणे धरणात अज्ञाताचा मृतदेह तरंगताना स्थानिकांना दिसला. याची माहिती मिळताच तातडीने वाळपई पोलीस घटनास्थळी दाखल झाले. अग्निशमन दलाच्या मदतीने मृतदेह बाहेर काढण्यात आला आहे.

सकाळीच या भागातील काही लोकांना धरणाच्या पाण्यात काहीतरी तरंगत असल्याचं आढळलं. जवळ जाऊन पाहिल्यावर तो एका व्यक्तीचा मृतदेह असल्याचं स्पष्ट झालं. याची माहिती स्थानिकांनी तातडीने वाळपई पोलिसांना दिली. पोलिसांनी घटनास्थळी दाखल होत पंचनामा केला. मात्र मृतदेह पाण्यात असल्याने पोलिसांना अग्निशमन दलाची मदत घ्यावी लागली. हा मृतदेह नेमका कुणाचा याबाबत अद्याप कोणतीही माहिती मिळू शकलेली नाही. पोलिसांनी मृतदेह उत्तरीय तपासणीसाठी पाठवला असून त्याचा अहवाल आल्यानंतरच मृत्यूचं नेमकं कारण समजणार आहे.

दरम्यान सत्तरी परिसरात मृतदेह आढळण्याची ही पहिलीच वेळ नाही. याआधी काही महिन्यांपूर्वी साखळी सुर्ला फेरीजवळ अज्ञात व्यक्तीचा मृतदेह तरंगताना आढळला होता. हा मृतदेह पुरुषाचा असल्याचं स्पष्ट झालं होतं. तर अंजुणे धरणातील मृतदेहही एका पुरुषाचाच आहे. अद्याप या मृतदेहाची ओळख पटवण्याचं काम सुरु असून ही आत्महत्या आहे की घातपात याचा तपासही पोलीस करत आहेत.