पणजी : साखळी सुर्ला फेरीजवळ अज्ञात व्यक्तीचा मृतदेह तरंगताना आढळला आहे. हा मृतदेह पुरुषाचा असल्याची प्राथमिक माहिती आहे. पोलिसांनी घटनेची माहिती मिळताच धाव घेत तपास सुरु केला आहे.

साखळीजवळील (Sanquelim) सुर्ला फेरी पॉईंटजवळ आज सोमवारी सकाळी एक मृतदेह तरंगताना आढळल्याने खळबळ उडाली होती. स्थानिकांनी याची माहिती लगेच पोलिसांना दिली. पोलिसांनीही घटनास्थळी दाखल होत मृतदेह पाण्याबाहेर काढला आहे. दरम्यान हा मृतदेह एका पुरुषाचा असल्याची प्राथमिक माहिती आहे. अद्याप या मृतदेहाची ओळख पटवण्याचं काम सुरु असून ही आत्महत्या आहे की घातपात याचा तपासही पोलीस करत आहेत.

दरम्यान गेल्या आठवड्याभरात तीन मृतदेह गोव्यात (Goa) सापडले आहेत. यापैकी कुडणे येथील एकाने खाणबंदीमुळे बेरोजगारी आल्याने जीवन संपवत असल्याची चिठ्ठी लिहून आत्महत्या केली होती. तर दुसरीकडे पेडणे तालुक्यातील भटवाडी-कोरगाव येथील डोंगराळ भागात काल रविवारी सकाळी रशियन नागरिकाचा मृतदेह आढळून आला होता. आता हा तिसरा मृतदेह सापडल्याने गोवा पोलिसांपुढे (Goa Police) तपासाचं मोठं आव्हान निर्माण झालं आहे.