मडगाव : ‘राज्य सरकारने खाणी बंद करण्याचा आदेश दिल्याने आमच्या कंपनीतील कामगारांना कामावरून काढून टाकण्याची परवानगी द्या’, अशी मागणी वेदांता सेसा कंपनीने केंद्र सरकारकडे केली आहे. यासाठी तीन महिन्यांची नोटीस देण्यात आली असून ऑक्टोबरपर्यंत आपले सर्व कामकाज बंद करण्याचे संकेत वेदांताने याचिकेत दिले आहेत.

सरकारने आमची लिजेस बंद करून खाणीवरील सर्व सामग्री काढून घेण्याचा आदेश दिल्याने. त्यामुळे नाईलाजाने हा निर्णय घ्यावा लागत आहे. आमची कंपनी ही कामगारांची हित पाहणारी असून गोव्यातील खाण व्यवसायावर काही तरी तोडगा निघेल अशी आमची आशा होती.

- जोसेफ कुयेलो, सरव्यवस्थापक, वेदांता कंपनी

आता पाणी नाकापर्यंत पोहोचले आहे. निदान आतातरी सरकारने गप्प न बसता एक तर लिलाव करून किंवा महामंडळ स्थापन करून खाणी सुरू कराव्या आणि कामगारांना न्याय द्यावा.

पुती गावकर, कामगार नेते

वेदांताच्या गोव्यात तीन कंपन्या चालत असून त्या अंतर्गत आठ खाणी चालतात. कंपनीने कामकाज बंद केल्यास 870 कामगारांवर बेकारीची कुऱ्हाड कोसळेल. वेदांता कंपनीचे सरव्यवस्थापक जोसेफ कुयेलो म्हणाले, ‘आम्ही 2018 पासून कामगारांना कामावर ठेवले होते.

पण 4 मे 2022 रोजी खाण खात्याने आमचे सर्व व्यवहार बंद करून खाणीवरील यंत्रसामग्री काढून घ्या अशी नोटीस दिली. जेणेकरून आमच्यासमोर दुसरा पर्याय बाकी नाही.’