मडगाव : फातोर्ड्याचे पोलीस निरीक्षक कपील नायक यांनी आपल्याला जातीवाचक शिवीगाळ केल्याची तक्रार फातोर्ड्यातील दोन एसटी महिलांनी दक्षिण गोवा पोलीस अधीक्षक अभिषेक धनिया यांच्याकडे केली असून नायक यांच्याविरूद्ध अनुसूचित जाती जमाती अत्याचार प्रतिबंधक कायद्याखाली कारवाई करावी अशी मागणी केली आहे.

इनासिया कुलासो व दितोजा फालेरो या दोन महिलांनी आज ही तक्रार दिली आहे. निरीक्षक नायक यांनी आपल्याला 'गावडी' असे म्हटल्याचे त्यांनी आपल्या तक्रारीत म्हटले आहे.

गोवा फॉरवर्डने गुरुवारी काढलेल्या मोर्चावेळी हा प्रकार घडल्याचे त्यांनी आपल्या तक्रारीत म्हटले आहे. आम्ही फातोर्डा चौकावरून घरी जात असताना वाटेत गोंधळ झाल्यामुळे आम्ही थांबलो असता, नायक यांनी आपल्याला उद्देशून 'गावड्यानो गपचूप घरी जा अन्यथा तुम्हाला अटक करून तुरुंगात टाकू 'असे म्हटल्याचे या तक्रारीत नमूद केले आहे.

निरीक्षक नायक हे आम्हाला धमकावत असल्याचे पाहून आमदार (MLA) विजय सरदेसाई यांनी त्यांना लोकांना पोलिसी खाक्या दाखवू नका असे समजावण्याचा प्रयत्न केल्याचेही या तक्रारीत म्हटले आहे.

गुरुवारी गोवा फॉरवर्ड (Goa Forward) कार्यकर्त्यानी मतदारसंघातील कामे बंद ठेवल्याने अधिकाऱ्यांना जाब विचारण्यासाठी मोर्चा काढला होता. त्यावेळी सरदेसाई आणि निरीक्षक नायक यांच्यात वाद झाला होता. त्यानंतर पोलिसांनी विजय सरदेसाई (Vijay Sardesai) आणि इतर 100 जणांवर सरकारी अधिकाऱ्यांना कायदेशीर कारवाई करण्यापासून रोखले व सार्वजनिक रस्ता अडविला असा ठपका ठेऊन गुन्हा नोंद केला होता.