Calangute: कळंगुटमध्ये कर्नाटकच्या दोघा पर्यटकांना लुटल्याचा प्रकार उघडकीस आला आहे. या पर्यटकांना मारहाण करत त्यांच्याकडील ३० हजार रूपये जबरदस्तीने युपीआय ट्रॅन्झॅक्शनद्वारे लुटले आहेत. कळंगुट परिसरातील तिघा दलालांनी हे कृत्य केले आहे.

या प्रकरणी सतीशकुमार श्रीनिवास शेट्टी (वय 39 वर्षे) यांनी तक्रार दाखल केली होती. ते मूळचे बस्तरहळ्ळी कोलार कर्नाटक येथील रहिवासी आहेत.

त्यांनी दिलेल्या तक्रारीनुसार 17 ऑक्टोबर रोजी एका टुरिस्ट गाईडने कम दलालाने शेट्टी आणि त्यांच्या मित्राला मारहाण केली. यात आणखी दोघेही सहभागी होते. जीवे मारण्याची धमकी देत या दलालांनी शेट्टी यांच्या बँक खात्यातील 30 हजार रूपये युपीआय ट्रॅन्झॅक्शनद्वारे लुटले.

दरम्यान, पोलिसांनी या प्रकरणी तिघाही संशयित टुरिस्ट कम दलालांना अटक केली आहे.

पहिल्या संशयिताचे नाव शारूखखान बशिरअहमद देवागिरी (वय 25 वर्षे) असे आहे. तो सध्या अल्मेडा स्कूल कानका, पर्रा येथील रहिवाशी आहे. तो मूळचा अत्तार स्ट्रीट देविहोसूर हावेरी कर्नाटक येथील आहे.

सिरिल आलेक्स डायस (वय 42 वर्षे) असे दुसऱ्या संशयिताचे नाव आहे. तो सेंट सेबॅस्टियन चॅपेल देवसू पेडणे येथील रहिवासी आहे. तर तिसऱ्या संशयिताचे नाव आहे अविनाश कांती पटेल (वय 32 वर्षे). तो सध्या हनुमान मंदिर खोब्रावाडो कळंगुट येथे राहतो. तो मूळचा दिव दमण येथील आहे.

या प्रकरणी पोलिसांनी तिघा संशयितांना अटक केली आहे. त्यांना न्यायालयाने तीन दिवसांची पोलिस कोठडी सुनावली आहे.

कळंगुटमधील पोलिस उपनिरीक्षक राजाराम बागकर पुढील तपास करत आहेत. कळंगुट पोलिस ठाण्याचे पोलिस निरीक्षक परेश नाईक आणि पर्वरीचे एसडीपीओ विश्वेश करपे यांच्या मार्गदर्शनाखाली हा तपास करण्यात आला.