मडगावातील सिने लता परिसरातून रेंट अ बाईक तत्त्वावर पर्यटकांना दिल्या जाणाऱ्या दोन स्कूटर्स एकाच रजिस्टर क्रमांकाच्या असल्याचे दिसून आल्यावर या भागात आश्चर्याबरोबरच खळबळ निर्माण झाली आहे. या स्कूटर्सचा मालक कोण, याचाही तपशील मिळत नसल्याने याप्रकरणी एक गूढ निर्माण झाले आहे. सध्या या दाेन्ही स्कूटर्स वाहतूक पोलिसांनी जप्त करून मडगाव पोलिस स्थानकावर ठेवण्यात आल्या आहेत. या दोन्ही क्रमांकपट्ट्या बनावट तर नाहीत ना, याचा तपास आता पोलिस घेत आहेत.
सिने लता परिसरात पार्किंगसाठी ठेवलेल्या जागेत या रेंट अ बाईक आणून ठेवतात, अशा तक्रारी यापूर्वी येत होत्या. आज मडगावच्या वाहतूक पोलिसांनी एक निनावी फोन आला आणि सिने लता परिसरात एकाच क्रमांकाच्या दोन बाईक्स पार्क करून ठेवल्याचे त्यांना सांगण्यात आले.
मडगावचे वाहतूक पोलिस निरीक्षक संजय दळवी यांनी आपले उपनिरीक्षक देसाई यांना या परिसरात पाठविले असता तिथे जीए ०८ व्ही - ०९९१ या एकाच क्रमांकाच्या दोन ॲक्टिव्हा स्कूटर्स पार्क करून ठेवल्याचे त्यांना दिसून आले. त्यानंतर वाहतूक पोलिसांनी वाहने ॲपवर हे क्रमांक अपलोड करून पाहिले असता, या क्रमांकाच्या दुचाकी कुणाच्याही नावावर नोंद नाहीत, हे दिसून आले. यामुळे या प्रकाराचे गूढ वाढले असून मडगावचे पोलिस निरीक्षक तुळशीदास नाईक हे या प्रकरणात तपास करीत आहेत.
दैनिक गोमंतकचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.