येणाऱ्या काळात आरोग्य क्षेत्रात मोठा बदल घडवून आणताना युवक-युवतींना आरोग्य क्षेत्रात प्रशिक्षण देण्यासाठी उत्तर व दक्षिण गोवा येथे दोन नर्सिंग कॉलेज सुरू करण्याचा प्रयत्न असणार आहे.

त्यामुळे लाखो रुपये खर्च करून बाहेरच्या राज्यात नर्सिंगचे प्रशिक्षण घेण्यासाठी जाणाऱ्या राज्यातील मुलांची संख्या कमी होणार आहे, असे प्रतिपादन शनिवार, 25 रोजी राज्याचे आरोग्यमंत्री विश्वजीत राणे यांनी मोर्ले-सत्तरी येथे आरोग्य शिबिराच्या उद्‌घाटनप्रसंगी केले.

ते पुढे म्हणाले,‘प्रशासन तुमच्या दारी’ या उपक्रमानुसार आरोग्य शिबिरे आयोजित करून आरोग्य जनतेच्या दारी पोहोचविण्याचा प्रयत्न सुरू आहे.

यावेळी गोवा वैद्यकीय महाविद्यालयाचे डीन डॉ. शिवानंद बांदेकर, आरोग्य संचालनालयाच्या संचालक डॉ. गीता काकोडकर, आरोग्यमंत्र्यांच्या सल्लागार डॉ. गीता देशमुख, डॉ. नाईक, केरी जिल्हा पंचायत सदस्य देवयानी गावस, होंडा जिल्हा पंचायत सदस्य सगुण वाडकर, मोर्ले सरपंच अमित शिरोडकर, सामाजिक कार्यकर्ते विनोद शिंदे, तसेच उपसरपंच, पंच व आरोग्य खात्याचे विविध अधिकारी उपस्थित होते.

या कार्यक्रमाचे सूत्रसंचालन डॉ. वैभव गाडगीळ यांनी केले तर साखळी आरोग्य केंद्राचे वैद्यकीय अधिकारी डॉ. अतुल पै यांनी आभार मानले.

120 कोटींची मोफत औषधे

गोवा वैद्यकीय महाविद्यालय व रुग्णालयांत राज्यातील जनतेला दरवर्षी सुमारे 120 कोटी रुपयांची मोफत औषधे पुरविण्यात येत आहेत.

त्यामुळे सर्वसामान्य नागरिकांना याचा लाभ होत आहे. येणाऱ्या काळात याहीपेक्षा जास्त सुविधा जनतेला उपलब्ध करून देण्यासाठी आपण प्रयत्नशील राहणार आहे, असे मंत्री विश्वजीत राणे यांनी सांगितले.