Goa News: हैदराबादमधील दोघांना ओलिस ठेवून त्यांच्या मालकाकडून 4 कोटी रुपयांची खंडणी मागितल्याप्रकरणी 11 जणांना गुन्हा अन्वेषण शाखेने काल अटक केली. ताब्यात घेतलेल्या संशयितांपैकी 10 जण गोव्यातील आहेत, तर एकजण हैदराबादमधील आहे.

या प्रकरणातील मुख्य संशयित फातोर्डा येथील अल्ताफ सय्यद हा असून इतर सर्व आरोपींना हैदराबाद पोलिसांच्या स्वाधीन केले जाईल, अशी माहिती उत्तर गोवा पोलिस अधीक्षक निधीन वाल्सन यांनी दिली. रायबंदर येथे पत्रकार परिषदेत ते बोलत होते.

हैदराबाद येथील दोघांना गोव्यात ओलिस ठेवल्याची तक्रार त्यांच्या कंपनीने हैदराबाद पोलिसांत नोंदवल्यानंतर त्यांनी गोेवा पोलिसांशी संपर्क साधला होता.

तेव्हा गुन्हा अन्वेषण शाखेचे अतिरिक्त पोलिस अधीक्षक राजू राऊत देसाई यांच्या नेतृत्वाखाली पथक तयार करण्यात आले होते.

सूत्रधार ‘पीएफआय’शी संबंधित

या प्रकरणातील मुख्य संशयित अल्ताफ सय्यद हा पॉप्युलर फ्रंट ऑफ इंडिया (पीएफआय) या बंदी घातलेल्या संघटनेशी संबंधित आहे. त्याच्यावर अनेक गुन्हे दाखल आहेत.

इतर संशयितांमध्ये सुनील नाईक (सांगे), निखिल पटेल (फोंडा), शफीउल्ला (मडगाव), जाफर सादिक शेख हसन (सावर्डे), सागर (म्हापसा), निशांत (पर्वरी), अस्लम सय्यद (मडगाव), सादिक शेख (नावेली), जोस आल्ड्रिन (केपे) आणि तुकाराम धोंडगे (हैदराबाद) यांचा समावेश आहे.