पणजी: कायदा आणि सर्वसामान्य जनतेचे रक्षक असणाऱ्या पोलिसांनीच महिला सुरक्षा रक्षकांची छेड काढल्याचा प्रकार उघडकीस आला आहे. राजधानी पणजीत पाटो पुलाजवळ रात्रीच्या सुमारास ही घटना घडली. याप्रकरणी पणजी पोलिसांत गुन्हा नोंद करण्यात आला असून, दोन्ही पोलिसांना निलंबित करण्यात आले आहे.

मिळालेल्या माहितीनुसार, दोन पोलिसांनी पणजीतील पाटो पुलाजवळील एका क्लबमध्ये दारुच्या नशेत गोंधळ घातला. दोन्ही पोलिसांनी क्लबमधील महिला सुरक्षा रक्षकांची छेड काढून त्यांना त्रास दिला. याप्रकरणी पणजी पोलिसांत गुन्हा नोंद करण्यात आला आहे. दोन्ही पोलिसांना सेवेतून निलंबित करण्यात असून, अधिक तपास सुरु आहे.

कायदा आणि जनतेचे रक्षक म्हणून सर्वसामान्य जनता पोलिसांकडे पाहत असते. गोवा पोलिसांनी कोलवा समुद्रकिनारी भीती दाखवून दोन हजार रुपये लाच घेतल्याचा आरोप एका व्यक्तीने केला.

त्यानंतर आता पोलिसांनीच महिलांची छेड काढल्याचा प्रकार घडला आहे. यापूर्वी मडगाव पोलिस स्थानकातील पोलिस अधिकाऱ्यावर विनयभंगाचा आरोप करण्यात आला होता. तर. फोंडा येथील अपघातात देखील पोलिसांनी गोंधळ घातल्याचे समोर आले होते.