Mumbai Goa Highway Accident: मुंबई-गोवा महामार्गावर आज सकाळी दोन अपघातांची नोंद झाली आहे. पेण येथे कामगारांना घेऊन जाणारी बस उलटल्याने कामगारांना दुखापत झाली आहे. तर, गॅस सिलिंडर घेऊन जाणाऱ्या ट्रकला चारचाकी धडकल्याने यात विवाहीत महिलेचा मृत्यू झाला आहे. पेण नजीक हमरापुर येथे हा अपघात झाला.

ट्रकला चारचाकी धडकल्याने विवाहित महिलेचा मृत्यू

गॅस सिलींडर वाहून नेणाऱ्या ट्रकला चारचाकीने मागून जोरदार धडक दिल्याने स्पृहा खवळे वय (वर्ष 24 रा. देवगड) ही महिला जागीच ठार झाली आहे. तर तीचा पती सुमित खवळे (वय वर्ष 28) हा जखमी झाला आहे. देवगडवरून मुंबईला आंबे घेऊन येत असताना त्यांचा हा अपघात झाला.

वाहनावरील ताबा सुटल्याने समोर असलेल्या गॅस सिलींडरच्या गाडीवर त्यांची चार चाकी धडकली. या भीषण अपघातात खवळे यांच्या पत्नीचा जागीच मृत्यू झाला.

कामगारांना घेऊन जाणारी बस उलटली

JSW कंपनीच्या कामगारांना घेऊन जाणारी बस भर रस्त्यात उलटली, या अपघातात अनेक कामगार जखमी झाले आहेत. पेणजवळील उचेडे येथे हा अपघात झाला असून, जखमी कामगारांना उपचारासाठी नजीकच्या रूग्णालयात दाखल करण्यात आले आहे.

आकाराने मोठी आणि लांब असलेली बस भर रस्त्यात पलटी झाल्याने संपूर्ण रस्ता वाहतुकीसाठी बंद झाला होता. दरम्यान, तात्काळ पोलिसांनी बस रस्त्यातून हटवली आणि वाहतूक पूर्ववत झाली. मात्र, मुंबई-गोवा महामार्गावरील वाहतूक काही काळासाठी मंदावली होती.