Goa Crime News: प्रेमसंबंध तोडल्याने रागाच्या भरात आपल्या पूर्वाश्रमीच्या ३० वर्षीय मैत्रिणीचा चाकूने वार करून निर्घृण खून केलेला मुख्य संशयित फकीर उर्फ प्रकाश चुंचवाड तसेच या मृतदेहाची विल्हेवाट लावण्यास त्याला साहाय्य करणारा त्याचा साथीदार निरुपदी कडाकक्ल या दोघांना न्यायालयाने शनिवारी 10 दिवसांची पोलिस कोठडी सुनावली.

कामाक्षी उड्डापनोव हिचा शवविच्छेदनाचा अहवाल शनिवारी (ता.२) सायंकाळी आला असता, यामध्ये तिच्या गळ्यापासून पोटापर्यंत शरीरावर तब्बल चाकूचे २० वार असल्याचे समोर आले. यातून, संशयिताच्या मनात कामाक्षीबद्दल द्वेष व प्रचंड राग दडला होता, हे अधोरेखित झाले. या चाकूच्या वारांमुळेच कामाक्षीचा मृत्यू झाल्याचे निष्पन्न झाले.

ही खुनाची घटना बुधवार, ३० ऑगस्ट रोजी घडली होती. कामाक्षी उड्डापनोवा असे खून झालेल्या तरुणीचे नाव असून संशयितांनी तिचा मृतदेह आंबोली घाटात ५० फूट खोल दरीत फेकून दिला होता.

नंतर आले वास्तव समोर

संशयित प्रकाशने नंतर आपला मित्र निरुपदीला सोबत घेऊन कामाक्षीचा मृतदेह आंबोली घाटात फेकून दिला होता. ज्या चारचाकीमधून हा मृतदेह नेला होता, ती गाडी प्रकाशच्या मालकीची आहे.

सुरवातीला प्रकाशने कामाक्षीचा मृतदेह आंबोलीच्या घाटात कुठेतरी पुरला असून आपल्याला नेमके ठिकाण माहिती नाही, असे सांगून पोलिसांची दिशाभूल करण्याचा प्रयत्न केला. मात्र, पोलिसी खाक्या दाखवताच त्याने कामाक्षीच्या खुनाची कबुली देत, आपले क्रूर वास्तव पोलिसांना सांगितले.