Goa Accident : मांद्रेत भरधाव ट्रकची एका इलेक्ट्रिक दुचाकीला जोरदार धडक बसल्याने अपघात झाला आहे. शनिवारी सकाळी झालेल्या या अपघातात एका महिलेचा जागीच मृत्यू झाला. सुप्रिया म्हामल असं या मृत महिलेचं नाव आहे. पेडणे परिसरातील अपघातांमुळे रस्ते सुरक्षिततेचा मुद्दा पुन्हा एकदा ऐरणीवर आला आहे.

सकाळी ही महिला आपली इलेक्ट्रिक दुचाकी घेऊन घराबाहेर पडली होती. मात्र पेडणे मांद्रे परिसरात आल्यावर एका भरधाव ट्रकची धडक दुचाकीला बसली, ज्यात चालक महिलेचा मृत्यू झाला. अपघातानंतर काहीकाळ परिसरात तणावही पाहायला मिळाला. गेल्या काही वर्षांपासून महामार्गाचं काम सुरु आहे. मात्र त्यामुळे रस्त्यांवर अनेक ठिकाणी खड्डेही पडल्याचं पाहायला मिळालं आहे. यामुळे अनेक अपघात या परिसरात झाले आहेत. स्थानिकांनी लवकरात लवकर या महामार्गाचं काम पूर्ण करण्याची मागणी केली आहे. अजून किती बळी गेल्यानंतर सरकार जागं होणार असा संतप्त सवालही स्थानिकांनी उपस्थित केला आहे.

दरम्यान मागच्याच महिन्यात तोरसे - येथील बीएड कॉलेजजवळ झालेल्या दुचाकी आणि टेम्पो अपघातात कुडाळ येथील योगेश परब या तरुणाचा जागीच मृत्यू झाला होता. या अपघातानंतर गिरी म्हापसा येथेही नुकताच पर्यटकांच्या कारला अपघात झाला होता, ज्यात महाराष्ट्रातील 8 प्रवासी गंभीर जखमी झाले होते.