तृणमूलची सोशल मीडिया मोहीम सुरू झाली आहे. आता गोव्यात तृणमूल काँग्रेसच्या गळाला किती मोठे मासे लागतात याचे चित्र अजून स्पष्ट झालेले नसले तरी या बंगाल स्थित पक्षाने गोवा विधानसभा निवडणुकीसाठीची आपली सामाजिक माध्यम मोहीम मात्र सुरू केली आहे.

‘गोंयाक जाय दीदी’ हे या मोहिमेचे ब्रीदवाक्य असून गोव्यासाठी विकास आणि प्रगतीच्या नव्या लाटेत तुमचे स्वागत असा मथळा दीदीच्या फोटोसहीत ठळकपणे टाकण्यात आले आहे. फेसबुक पेजला सध्या 300 लाईक्स आले असून बहुतेक नकारात्मक कॉमेंट्स आहेत. आतापर्यंत काही पक्षांनी चंद्र तारेसुद्धा आणण्याची आश्वासने दिली असल्यामुळे नवीन पक्षांना बरीच कल्पनाशक्ती वापरावी लागणार आहे हे मात्र खरे.

भाजपला हरविण्याची क्षमता

गोव्यात ममतादीदींना गंभीरपणे राजकीय काम करायचे आहे. काँग्रेस पक्ष भाजपविरोधी राजकारणात महत्त्वपूर्ण भूमिका बजावू शकत नाही. संपूर्ण देशात या पक्षाचे नेतृत्व सपशेल अपयशी झाल्याचा आरोप करताना ममतादीदींच्या नेतृत्वाखालील तृणमूल काँग्रेसने अनेक पातळीवर भाजपचा विरोध केला आणि पश्चिम बंगालच्या निवडणुकीत या पक्षाला पाणी पाजले. गोव्यात भाजपला हरविण्याची क्षमता तृणमूल काँग्रेसमध्ये असल्याचाही दावा त्यांच्या नेत्यांनी केला. गोव्यात आपल्याला सर्व ठिकाणाहून चांगला प्रतिसाद मिळत असल्याचा दावा नेत्यांनी आहे.