पणजी: गेल्या विधानसभा निवडणुकीमध्ये तृणमूल काँग्रेसला चांगले यश मिळाले असून येत्या विधानसभा निवडणुकांमध्ये पक्ष सत्तेत येईल असा आशावाद तृणमूल कॉंग्रेसचे गोवा प्रभारी किर्ती आझाद यांनी व्यक्त केला आहे.

विधानसभा निवडणुकांपूर्वी चार महिने गोव्यात येऊन प्रचंड गाजावाजा करून निवडणुका लढवलेल्या तृणमूल काँग्रेसला विधानसभा निवडणुकांमध्ये फारसे यश आले नाही. आता तृणमूल काँग्रेसने गोवा प्रभारीची जबाबदारी खासदार महुआ मोईत्रा यांच्याकडून काढून माजी क्रिकेटपटू कीर्ती आझाद यांच्याकडे दिली आहे.

आझाद यांनी राज्यात तृणमूल काँग्रेसमध्ये बदल केले जातील असे संकेत देत येत्या विधानसभा निवडणुकीत पक्ष सत्तेवर असेल असा आशावाद व्यक्त केला आहे. आत्तापर्यंतच्या सर्व विधानसभा निवडणुकांमध्ये तृणमूल काँग्रेसने दाखवलेली प्रगती इतर राजकीय पक्षांपेक्षा शेकडो पट जास्त आहे असे म्हणत पहिल्यांदाच निवडणुका लढवून 8.5 टक्के मते मिळवणे हे आत्तापर्यंत काँग्रेस आणि भाजपला शक्य झाले नव्हते असे म्हटले आहे.

राज्यात विधानसभा निवडणुकीनंतर मोठ्या प्रमाणामध्ये तृणमूल

काँग्रेसचे नेते पक्ष सोडून जात आहेत. याबाबत विचारले असता ते म्हणाले, जे आमच्यासोबत राहतील त्यांना एकत्रित करून गोव्यात तृणमूल काँग्रेस वाढवण्यात येईल व लवकरच पक्षात मोठे बदल करण्यात येतील.