Trekking On Dudhsagar Waterfall is possible in Rainy Season : प्रसिद्ध दूधसागर धबधब्यावर आता पावसाळ्यात ट्रेकिंगला जाणे शक्य होणार आहे, तसा प्रस्ताव मुख्यमंत्री कार्यालयाच्या विचाराधीन आलेला आहे. या धबधब्याकडे जाणारा रस्ता अभयारण्यातून जातो. या रस्त्यावर दोन ठिकाणी नदी ओलांडावी लागते.

पावसाळ्यात मोले ते दूधसागर ही जीप वाहतूक बंद ठेवली जाते. त्यामुळे पावसाळ्यात दूध सागरचे दर्शन दुर्लभ होते. केवळ रेल्वे प्रवासाद्वारे हेच दूध सागर असे दर्शन घेता येते.

या ठिकाणी पावसाळ्यात जाण्यास बंदी असतानाही रेल्वे रुळावरून अनेक जण चालत जात असत. त्यांना अलीकडेच पकडून रेल्वे सुरक्षा दल कर्मचाऱ्यांनी ताकीद दिली. त्यांनी या पर्यटकरूपी भ्रमंतीकारांना उठाबशाही काढायला लावल्या होत्या. ही बातमी देशभर व्हायरल झाल्यामुळे सरकारवर टीकेची झोड उठली होती.

त्याची दखल घेत सनदशीर मार्गाने मोले ते दूधसागर हा गिर्यारोहणाचा मार्ग कसा खुला करता येईल, याचा विचार सरकारने सुरू केला आहे. गोवा पर्यटन विकास महामंडळाचे अध्यक्ष आमदार गणेश गावकर यांनीही या संदर्भात मुख्यमंत्र्यांशी चर्चा केली आहे. त्यामुळे लवकरच दूधसागर वर ट्रेकिंग करणे शक्य होईल, असे दिसते.