पणजी : माहिती हक्क कायद्याखाली सुदीप ताम्हणकर यांनी फ्रोटोमाईल्स कंपनीची मागितलेली माहिती 12 जुलै 2022 पर्यंत द्यावी, अन्यथा त्या दिवशी वाहतूक सचिवांनी हजर राहण्याचा निर्देश गोवा लोकायुक्तांनी दिला आहे.

सुदिप ताम्हणकर यांनी गोवा लोकायुक्तांकडे दाखल केलेल्या तक्रारीत सरकार, गोवा पर्यटन विकास महामंडळ, संचालक निखील देसाई, गोवा राज्य वाहतूक प्राधिकरण, वाहतूक सचिव व फ्रोटोमाईल्स प्रा. लि. यांना प्रतिवादी केले होते.

त्यांनी फ्रोटोमाईल कंपनीविरोधात तक्रार दाखल केली आहे. या कंपनीने वाहतूक खात्याकडे गोवा माईल्स ॲपसाठी दिलेली कागदपत्रे याची माहिती हक्क कायद्याखाली मागितली होती.

ही माहिती दिली जात नसल्याचे गोवा लोकायुक्तांच्या निदर्शनास आणून दिले होते. लोकायुक्तांनी वाहतूक खात्याला ही माहिती देण्याचे निर्देश देऊन टाळाटाळ केली जात होती. वाहतूक खात्यांकडून होणारी सतावणूक तक्रारदाराने पुन्हा लोकायुक्तांच्या निदर्शनास आणून दिल्यावर लोकायुक्तांनी त्याची गंभीर दखल देत 23 जून 2022 रोजी आदेश देऊन ही माहिती 12 जुलैपर्यंत देण्याचे निर्देश दिले होते.

वाहतूक खात्याने ही माहिती दिली नाही तर पुढील सुनावणीच्या दिवशी वाहतूक सचिवांनी हजर राहावे असे स्पष्ट संकेत दिले आहेत. वाहतूक खात्याकडून माहिती हक्क कायद्याखाली मागितलेली माहिती जाणूनबुजून दिली जात नाही. वेळोवेळी त्याबाबत टाळाटाळ केली जात होती. त्यामुळे तक्रारदाराला लोकायुक्तांकडे पुन्हा तक्रार करण्यास भाग पाडले होते.