पणजी: जीवरक्षकदल ‘दृष्टी’ संस्थेद्वारे जीवरक्षकांसाठी नवीन तंत्रे आणि प्राण वाचविण्याविषयी प्रशिक्षण शिबिर नुकतेच आयोजित केले होते. या प्रशिक्षणात शारीरिक कवायती, संवाद, समुद्रकिनाऱ्यांवरील अभ्यागत विशेषत: पर्यटकांनाही संघर्ष टाळण्यासाठी प्रभावी माध्यमाचा वापर याविषयी मार्गदर्शन करण्‍यात आले.

(Training lifeguards in new techniques in goa)

दरवर्षी जीवरक्षकांना अशा प्रशिक्षणातून जावे लागते. प्रथमोपचार, समुद्रकिनारी ऑपरेशन, जेट स्की ऑपरेशन, रेस्क्यू ट्युबचा वापर अशा विविध बचावतंत्रांचे प्रशिक्षण दिले जाते. त्‍यात प्रथमोपचारावर अधिकतर भर देण्यात येतो. बुडणाऱ्या व्यक्तीला बाहेर काढल्यानंतर त्याला जिवंत ठेवण्यासाठी विविध उपाययोजना केल्या जातात, त्याविषयी माहिती देण्यात आली. वैद्यकीयदृष्ट्या एखाद्या व्यक्तीला मृत घोषित करण्यात तीन ते चार मिनिटांचा कालावधीत असतो. त्या व्यक्तीच्या आयुष्यातील पहिली काही मिनिटे गंभीर असतात. म्हणूनच त्यावेळी उपचार होणे अपेक्षित असतात, याविषयी जीवरक्षकांना माहिती देण्यात आली.

या शिबिरात 400 मीटर पोहणे, सहनशक्ती, पोहण्याचा व्यायाम, स्ट्रोक सुधारणे, तीन ते पाच मीटर उड्या, पाण्याखाली पोहणे, मूलभूत बचाव अशा बाबी जीवरक्षकांना शिकविण्‍यात आल्‍या, असे प्रशिक्षक सांतानो फर्नांडिस म्हणाले.