Goa: गोवा सरकारच्या आरोग्य खात्याने यूएसएआयडी(USAID) या अमेरिकन संस्थेच्या आरआयएसई इंडिया प्रकल्पाअंतर्गत आरोग्यसेवांमध्‍ये सुधारणा करण्यासाठी एक वर्षाचा करार केला आहे. आरोग्यमंत्री विश्‍वजीत राणे (Vishwajeet Rane) यांनी आज या कार्यक्रमाचे रायबंदर येथील एका पंचतारांकित हॉटेलमध्ये उद्‍घाटन केले.

याप्रसंगी आरोग्य खात्याच्या (Department of Health) संचालक डॉ. आयरा आल्मेदा, यूएसएआयडीचे अधिकारी अमित शहा, डॉ. विनीत श्रीवास्तव यांच्यासह इतर संस्थांचे पदाधिकारी उपस्थित होते. आरोग्यमंत्री राणे म्‍हणाले की, पूर्णपणे मोफत उपलब्ध होणाऱ्या विविध सुविधा आणि जीनोम सेकियन्सी यंत्र गोव्याला या उपक्रमातून मिळणार आहे. एका वर्षासाठी हे सर्व उपलब्ध होणार असून राज्‍यातील डॉक्टरांना अमेरिकेत नव्या उपचारांचे व नव्या तंत्रज्ञानाचे प्रशिक्षण मिळणार आहे. त्यासोबत ऑक्सिजन व्यवस्थापन कसे करावे, याबाबतही मार्गदर्शन मिळणार आहे.

या करारानुसार नवे तंत्रज्ञान, नवे संशोधन आणि नव्या उपचारपद्धतीची देवाण-घेवाण होणार आहे. त्याचा फायदा गोमंतकीयांना उत्तमोत्तम उपचार उपलब्ध करण्यासाठी होणार असून कोरोना नियंत्रणासाठी व नव्या रोगांवर उपचारांसाठी होणार आहे. आरोग्य क्षेत्रात गोव्यातील लोकांना चांगले उपचार उपलब्ध व्हावेत यासाठी हा करार आहे. आपले सरकार इतर संस्थांचे सहकार्य घेऊन गोव्यातील लोकांना आरोग्य सुविधा उपलब्ध करत असल्याचे राणे म्हणाले.