Panaji Traffic Jam: पणजीत वाहतूक कोंडी ही नित्याचीच बाब झाली आहे. आज संध्याकाळी बांदोडकर रस्त्याच्या डांबरीकरणाच्या कामामुळे पूर्वसूचना न देता एकेरी वाहतूक सुरू करण्यात आली. त्यामुळे कदंब बसस्थानकापासून वाहनांच्या भल्या मोठ्या रांगा लागल्या.

त्यामुळे नागरिक, तसेच वाहनचालकांना नाहक मनःस्ताप सहन करावा लागला. एरवी वाहतुकीवर नियंत्रण ठेवणारे वाहतूक पोलिस आज गायब होते.

पाटो भागातही प्रचंड गैरसोय

पणजी शहरात जाणाऱ्या रस्त्यांवरील कोंडीमुळे मडगाव व फोंडा भागातून येणाऱ्या वाहनचालकांनी वाहने पुलाखालून पाटो प्लाझा भागातून मळा येथे जाणाऱ्या रस्त्याने वळविली. याच ठिकाणी आंतरराज्य खासगी बसगाड्या प्रवासी घेण्यासाठी उभ्या असतात.

या बस तेथून संध्याकाळी सुटतात. त्यामुळे आकाराने लहान असलेल्या रस्त्यावर वाहतुकीचा ताण वाढला आणि पाटो भागात, तसेच भाटले, सांताक्रूझकडे जाणाऱ्या रस्त्यावरही वाहनाच्या लांबच लांब रांगा लागल्या.