Goa Tourism: गोवा पर्यटन विकास महामंडळाअंतर्गत उत्तम पर्यटन सेवा असलेल्या इलेक्ट्रिक सायकल टूर्सला उच्चश्रेणीतील परदेशी पर्यटकांचा चांगला प्रतिसाद मिळत आहे. या इलेक्ट्रिक सायकल टूर्समुळे पर्यटकांना गोव्याच्या निसर्गाचा आणि स्थानिक संस्कृतीचा प्रत्यक्ष अनुभव घेण्याची संधी मिळते.​

गोवा हे जागतिक पर्यटनस्थळ असल्याने दरवर्षी लाखो पर्यटक गोव्याला भेट देतात. गेल्या काही वर्षांत देशांतर्गत पर्यटकांची संख्या वाढली आहे.

परंतु गोव्यात आता इतर देशांतील काही उच्चश्रेणीचे पर्यटक इलेक्ट्रिक सायकल टूर्सच्या अनोख्या अनुभवासाठी निवडत करत आहेत, जे मुख्यतः दिवाडी बेट, पणजी, जुने गोवे आणि राज्‍याच्‍या ग्रामीण भागाला पसंती देत आहेत.

गोवा पर्यटन विकास महामंडळाच्या सूत्रांनी सांगितले की, इलेक्ट्रिक सायकल टूर्समध्ये बॅटरीवर चालणाऱ्या सायकलींचा समावेश आहे. ही संकल्पना पहिल्यांदा गोव्यात नोव्हेंबर २०१८ मध्ये सुरू करण्यात आली.

हा उपक्रम आता उच्चश्रेणीतील पर्यटकांसाठी लाभदायक आणि आवडीचा ठरत आहे. पर्यटकांना इलेक्ट्रिक सायकली दिल्या जातात आणि त्‍यांना दिवाडी बेट, जुने गोवे हेरिटेज साईट, पणजी फोंतेन्‍हास आणि इतर अनेक ठिकाणी नेले जाते.

ग्रामीण जीवन, खाद्यपदार्थांचा आस्‍वाद

या दौऱ्यात पर्यटकांना ठिकाण, संस्कृती, परंपरा याबाबत मार्गदर्शन केले जाते. त्‍यांना गोव्याचे ग्रामीण जीवन पाहण्याची आणि स्थानिक खाद्यपदार्थांचा आस्वाद घेण्याची संधी मिळते. या दौऱ्याला साधारणतः दोन तास लागतात.

प्रतिव्यक्ती एक राईड १२०० रुपये आणि त्याहून अधिक आहे. पर्यटकांना या इलेक्ट्रिक सायकलींवर बॅचमध्ये फेरफटका मारला जातो. हा दौरा नवीन पर्यटन सेवेअंतर्गत येतो, ज्यात तृतीय पक्षाची नियुक्ती केली गेली आहे.