Dudhsagar Waterfall

गोवा आणि कर्नाटकच्या सीमेवर असणारा प्रसिद्ध दूधसागर धबधबा जगभरातील पर्यटकांना भूरळ घालत असतो. बंगळुरुतील एक पर्यटक जोडपे गोव्यात फिरण्यासाठी आले असता त्यांना देखील दूधसागरला जाण्याचा मोह आवरता आला नाही.

चारचाकीद्वारे जोडपे दूधसागरच्या दिशेने गेले खरे पण, धबधब्याजवळील घटनदाट जंगलात 62 वर्षीय पर्यटक अचानक बेपत्ता झाला. दोन दिवसांपासून या पर्यटकाचा शोध लागलेला नाही.

अब्दुल रफीक (62) असे या पर्यटकाचे नाव असून, गुरुवारपासून कुळे पोलिस त्याचा शोध घेत आहेत. अब्दुल रफीक बंगळुरुतील एका सॉफ्टवेअर कंपनीचा मालक असून, ते पत्नीसोबत गोव्यात आले होते.

चारचाकी वाहनातून दूधसागरच्या दिशेने जात असताना दुपारी दीडच्या सुमारास त्यांचे वाहन घनदाट जंगलात थांबले. अब्दुल वाहनातून खाली उतरले आणि त्यानंतर अचानक बेपत्ता झाले. त्यांच्या पत्नी आणि सहप्रवाशांनी तात्काळ शोध घेतला मात्र, त्यांचा शोध लागला नाही.

शोध न लागल्याने कुळे पोलिसांत धाव घेत तक्रार दाखल केली. पोलिसांनी तात्काळ शोधमोहीम राबवली मात्र, गुरुवारी अब्दुल आढळून आले नाहीत.

अब्दुल त्यांच्या पत्नीसह वार्का येथील हॉटेलमध्ये थांबले होते. दरम्यान, त्यांनी गोव्यात पर्यटनासोबत दूधसागर धबधब्याला भेट देण्याचे नियोजन केले होते.

दरम्यान, दुसऱ्यादिवशी देखील अब्दुल यांचा शोध लागला नसल्याने चिंता व्यक्त केली जात आहे. तसेच, घनदाट जंगलातून अब्दुल अचानक बेपत्ता कसे झाले याबाबत देखील विविध अंदाज बांधले जात आहेत.