Panaji News : पणजीराज्यात गेल्या आठवड्याभरापासून जोरदार पर्जन्यवृष्टी होत आहे. काल शनिवारी हवामान खात्याने राज्यात ‘रेड अलर्ट’ जारी करूनही आज रविवारी पणजीत देशी पर्यटकांची गर्दी दिसली. सलग सुट्ट्यांमुळे देशी पर्यटकांनी ‘सुपर संडे’चा अनुभव घेतला.

गेले दोन-तीन दिवस राज्यात मुसळधार पावसामुळे जनजीवन विस्कळीत झाले आहे. रस्त्यांवरही रहदारी कमीच आहे. अतिपावसामुळे मासेमारी करणारे ट्रॉलर्सही मच्छीमारांनी नांगरून ठेवले आहेत.

या सर्व गोष्टी जरी खऱ्या असल्या तरी आश्चर्य म्हणजे आज पणजीत रविवारी सकाळपासून भरपावसात शेकडो देशी पर्यटक, पणजी चर्चजवळ फोटोग्राफी, शूटिंग करताना दिसून आले.

हिरा दालमिया या मुंबईहून आलेल्या पर्यटकाने सांगितले की, पावसाळ्यात गोवा अगदी हिरवागार दिसत आहे. पर्यटकांची एरवी दिसणारी गर्दी दिसत नाही. तरीही आज बऱ्या संख्येत पणजी चर्चजवळ पर्यटक दिसले, हा खरं तर मला आश्चर्यकारक अनुभव होता.​

स्वीटी गरेवाल ही उत्तराखंड इथून आलेली युवती म्हणाली, पावसाळ्यात गोवा पाहण्याची माझी इच्छा होती. गोव्यात समुद्रकिनाऱ्यांशिवाय आणखी अनेक ठिकाणी आहेत हे मी ऐकले होते. आता उद्या सोमवारी मी दक्षिण गोव्यातील काही ठिकाणांना भेट देणार आहे.