पणजी : तृणमूल काँग्रेसने फातोर्डा मतदारसंघातून सेओला वाझ यांना उमेदवारी जाहीर केली आहे. या जागेसाठी तृणमूल काँग्रेसचे खासदार लुईझिन फालेरो यांचं नाव घोषित करण्यात आलं होतं. मात्र पक्षाच्या या निर्णयावर लुईझिन फालेरो यांनी नाराजी व्यक्त केली होती. उमेदवारी जाहीर करण्यापूर्वी तृणमूल काँग्रेस पक्षाने आपल्याला विचारात घेतलं नसल्याने त्यांनी नाराजी उघड केली होती. (Luizinho Faleiro Latest News Updates)

दरम्यान तृणमूल काँग्रेसने शुक्रवारी सकाळी एक पत्रकार परिषद घेऊन वाझ यांना उमेदवारी जाहीर केली आहे. पक्षाने फातोर्डा (Fatorda) मतदारसंघातून लुईझिन फालेरो यांना उमेदवारी जाहीर केली होती, मात्र ते विधानसभा निवडणूक लढवण्यास इच्छुक नव्हते. त्यामुळे पक्षाने फालेरो यांच्याजागी तरुण आणि पेशाने वकील असलेल्या सेओला वाझ यांना उमेदवारी जाहीर केल्याचं तृणमूल काँग्रेसच्या (TMC) पत्रकार परिषदेत सांगण्यात आलं आहे.

सेओला वाझ या फातोर्डा मतदारसंघातीलच रहिवासी असून गेल्या काही काळापासून तृणमूल काँग्रेसमध्ये सक्रीय आहेत. लुईझिन फालेरोंऐवजी आता फातोर्ड्यात विजय सरदेसाई (Vijay Sardesai) आणि दामू नाईक यांच्यासोबत सेओला वाझ निवडणुकीच्या रिंगणात असतील.