मुरगाव नगरपालिका कामगारांना वेतनाचा प्रश्न गेल्या अनेक वर्षापासून सतावत असून याला पूर्णपणे जबाबदार सत्ताधारी भाजप पालिका मंडळ असल्याची तीव्र प्रतिक्रिया गोवा प्रदेश काँग्रेस अल्पसंख्यांक विभागाचे अध्यक्ष नजीर खान यांनी दिली. मुरगाव नगरपालिका कामगारांना जानेवारी 2022 महिन्याचे वेतन अजूनही मिळाले नसल्याने कामगार व त्यांच्या कुंटूबियांवर आर्थिक संकटा बरोबर उपासमारीची वेळ आली आहे. विधानसभा निवडणुकीत (Assembly Election) सत्ताधारी भाजप फक्त आश्वासने देतात. प्रत्यक्षात मात्र जनतेला आर्थिक संकटात टाकत आहेत.

गोव्यात काँग्रेस पक्षाची सत्ता आल्यास मुरगाव (Mormugao) नगरपालिके बरोबर राज्यातील इतर पालिका कामगारांना वेतनाविना काँग्रेस सरकार कधीच ठेवणार नसून त्यांना आगाऊ वेतन दिले जाईल अशी माहिती नजीर खान यांनी दिली. वास्को बायणा येथील गोवा काँग्रेस (Congress) अल्पसंख्यांक विभागाच्या कार्यालयात आयोजित पत्रकार परिषदेत वरील माहिती अध्यक्ष नजीर खान यांनी दिली.

यावेळी त्यांच्या समवेत वास्को कॉंग्रेस प्रभारी तथा ओरिसा काँग्रेस अल्पसंख्यांक अध्यक्ष महंमद जिया उल हक, साजिद खान, एलविनो अरावओ पस्थित होते. पुढे बोलताना नजीर खान म्हणाले की गेल्या अनेक वर्षापासून मुरगाव पालिकेत भाजपा नगरसेवक सत्तेवर असून सुद्धा कामगारांना वेळेवर वेतन देऊ शकत नाही. याला पूर्णपणे जबाबदार सत्ताधारी भाजप नगरसेवक असल्याचा आरोप खान यांनी केला.

सत्ताधारी भाजपचे (BJP) नगरसेविका शमी साळकर वास्को (Vasco) बायणा इस्लामपूर भागात प्रचार करून येथील युवकांना नोकर्‍या देणार असे आश्वासन देत असून, सर्वप्रथम शमी साळकर यांनी पालिकेच्या कामगारांना वेतन देण्यासाठी पुढाकार घ्यावा असे आवाहन खान यांनी केले. नगरसेवक दीपक नाईक यांनी पालिकेत असताना फक्त स्वतःचा विकास केला.

परंतू आपल्या प्रभागाचा विकास करण्यास सपशेल अपयशी ठरला असल्याचा आरोप नजीर खान यांनी केला. दीपक नाईक नगराध्यक्षपदी असताना पालिका कामगारांना वेतनाचा प्रश्न भेडसावत आहे, तो अजूनपर्यंतही आहे. परंतु राज्यात काँग्रेस सरकार आल्यास राज्यातील सर्व पालिका मंडळांना आगाऊ वेतन दिले जाईल असे आश्वासन शेवटी नजीर खान यांनी दिले.