Tillari Dam Under Threat Due to Illegal Blasting in Quarrying Zone

डिचोली: महाराष्ट्र आणि गोवा राज्याचा संयुक्त प्रकल्प असलेले ''तिळारी'' धरणाचे अस्तित्व सध्या संकटात आले आहे. धरण क्षेत्रातील खानयाळे-शिरंगे परिसरात गौण खाणी (काळा दगड) उत्खननासाठी अंदाधुंद करण्यात येत असलेल्या जिलेटिन स्फोटांमुळे धरणाला धोका पोहचण्याची शक्यता व्यक्त करण्यात येत आहे.

या विरोधात खानयाळे गावातील नागरिकांनी आवाज उठवला असून आंदोलनाचे अस्त्र हाती घेतले आहे. गेल्या दोन दिवसांपासून साखळी उपोषण चालवले आहे. दरम्यान, डिचोलीतील (Bicholim) पत्रकारांच्या एका तुकडीने शुक्रवारी खानयाळे परिसराला भेट दिली. त्यावेळी या परिसरात मोठ्या प्रमाणात काळ्या दगडांचे उत्खनन सुरू असल्याचे दिसून आले. तसेच धरणात मोठ्या प्रमाणात मातीचा भराव टाकून काही भाग बुजवून टाकल्याचे दिसून येते.

तिळारी धरण परिसरात डोंगर फोडून काळ्या दगडांचे उत्खनन केले जात आहे. डोंगर फोडण्यासाठी जिलेटिनचा मोठ्या प्रमाणात वापर करण्यात येत आहे. स्फोटकांच्या प्रचंड आवाजाने परिसर हादरून जात आहे. यामुळे काही घरांच्या भिंतींना तडे गेले आहेत. यामुळे धरणाला तडे जाण्याची शक्यता आहे, अशी माहिती लक्ष्मण गावडे, संकेत शेट आणि इतर ग्रामस्थांनी दिली.

तिळारी धरण आधीच कमकुवत आहे, अशा स्थितीत धरण परिसरात होणाऱ्या जिलेटिन स्फोटांमुळे हे धरण आणखी कमकुवत होईल व याचा परिणाम दोडामार्ग तालुक्यासह गोव्यालाही भोगावा लागू शकतो. हे धरण फुटल्यास गावचे गाव उद्ध्वस्त होतील. गोवा सरकारने विशेष करून मुख्यमंत्री डॉ. प्रमोद सावंत (Chief Minister Dr. Pramod Sawant) आणि जलस्रोत मंत्री सुभाष शिरोडकर यांनी या प्रकाराकडे गांभीर्याने लक्ष घालावे, अशी मागणी साळ येथील रहिवासी मेघ:श्याम राऊत यांनी केली आहे.