डिचोली: सर्वपक्षीय कार्यकर्त्यांनी रोखलेले मणेरी-दोडामार्ग (Maneri-Dodamarg) येथील तिळारी कालव्याचे (Tilari Canal) दुरुस्तीकाम गेल्या दोन दिवसांपासून बंदच आहे. एकंदरीत सर्वपक्षीय कार्यकर्त्यांचा सध्याचा पवित्रा पाहता, हे काम आणखी काही दिवस तरी रेंगाळण्याचे संकेत मिळत आहे. यामुळे गोव्यातील (Goa) पाणी पुरवठाही लांबणीवर पडून पाण्यासाठी मारामारी होण्याची शक्यता निर्माण झाली आहे.

गेल्या ता. 10 रोजी पहाटे धनगरवाडी-मणेरी (दोडामार्ग) येथे तिळारीच्या कालव्याला मोठे भगदाड पडले आहे. सुरवातीस पावसाच्या व्यत्ययानंतर गेल्या आठवड्यापासून कालव्याचे दुरुस्तीकाम हाती घेण्यात आले आहे.

दुरुस्तीकाम बंद

पाटबंधारे विभागाच्या वरिष्ठ अधिकाऱ्यांच्या कार्यपद्धतीवर नाराजी व्यक्त करीत दोडामार्गमधील सर्वपक्षीय कार्यकर्त्यांनी गुरुवारी कालव्याचे दुरुस्तीकाम बंद पाडले आहे. तत्पूर्वी दोडामार्ग येथील तहसीलदार कार्यालयासमोर झालेल्या संयुक्त बैठकीत स्थानिक अधिकारी आणि कार्यकर्त्यांमध्ये शाब्दिक चकमक झाल्याची माहिती मिळाली आहे. जोपर्यंत पाटबंधारे विभागाचे वरिष्ठ अधिकारी दोडामार्ग येथे येऊन परिस्थिती जाणून घेत नाहीत. तोपर्यंत दुरुस्तीकाम करू देणार नाही. असा पवित्रा या कार्यकर्त्यांनी घेतला आहे.

पाणी पुरवठ्यावर परिणाम

कालव्याला भगदाड पडल्यापासून तिळारीतून गोव्यात होणारा पाणी पुरवठा बंद झाला आहे. उत्तर गोव्याची तहान भागवणाऱ्या अस्नोडा जलशुद्धीकरण प्रकल्पातही सध्या कच्च्या पाण्याचा तुडवडा असल्याची माहिती मिळाली आहे. आमठाणे धरणातील जलसाठाही 7 मीटरनी घटला आहे. तिळारीतून शक्य तितक्या लवकर गोव्यात पूर्ववत पाणी पुरवठा सुरु झाला नाही, तर पाण्यासाठी मारामारी होण्याची भीती आहे.