रोजच्या रुटीन लाईफ मधून विरंगुळा मिळण्यासाठी प्रत्येकाकडे काही ना काही छंद हवाच. कुणाला तिकिटे जमवण्याचा, कुणाला वेगवेगळ्या वस्तू जमवण्याचा तर कुणाला पुस्तके संग्रही ठेवण्याचा छंद असतो. कुडचडे येथील एका अवलियाने असाच एक छंद जोपासलाय. साहजिकच या छंदामुळे तो आता गोव्यात प्रसिद्धीला येऊ लागलाय. या अवलियाच नाव आहे शेखर नाईक. (The currency collector of Goa)

कुडचडे येथील शेखर नाईक यांना वेगवेगळ्या देशातील तसेच महाराजा यांच्या जमान्यातले पैसे गोळा करण्याचा छंद असून त्यांच्याकडे 150 देशातले वेगवेगळ्या पुरातन चलनी , तर 1000 किलो दुर्मिळ नाण्याचा संग्रह आहे. त्यांनी ही नाणी 10 ते 12 अल्बम करून जपून ठेवली आहेत. अवध्या दहा वर्षाचे असताना शेखर नाईक यांना आपल्या वडिलोपार्जित किराणा दुकानावर आलेल्या लोकांनी दिलेली नाणी न्याहाळताना कुतूहल निर्माण झाले.

पुढे त्यांचे हेच कुतुहूल त्यांचा छंद बनला. आजच्या घडीला त्यांच्याकडे नाण्याच्या संग्रहरुपी अनमोल संपत्तीचा साठा असून पहिल्या शतकापासून ते आजच्या काळात चालत असलेल्या नोटा तसेच नाण्यांचे कलेक्शन आहे. ही सगळी नाणी त्यांनी लॅमिनेटेड शीटमध्ये गुंडाळून, सविस्तर माहितीसह व्यवस्थित जपून ठेवली आहेत.