काणकोण: दसरा (Dussehra) झाल्यानंतर दिपावलीचे वेध सुरू होतात. या काळात या मातीत पिकवल्या जाणाऱ्या कंदमुळेचे सेवन आरोग्यदायी मानले जाते.त्यामुळेच दिपावलीचा सण जवळ आल्यानंतर काटे कणगा, झाड कणगा बाजारात उपलब्ध होतात. नगदी पीक म्हणून गेल्या पांच वर्षापासून काणकोणात काटेकणगाचे पीक मोठ्या प्रमाणात घेतले जाते.

या पिकातून वर्षाकाठी एक लाख रुपयांपर्यंत उत्पन्न घेणारे शेतकरी काणकोणात आहेत. काटेकणगाचे सर्वाधिक उत्पन्न खोतीगाव,गावडोंगरी व श्रीस्थळ पंचायत क्षेत्रात घेतले जाते.सद्या काटेकणगाचा प्रति किलो दर 70 ते 80 रूपये आहे.

पूर्वी गोवा बागायतदार (Goa horticulturist) संस्थेकडून काटेकणगाची घाऊक खरेदी केली जात होती.सद्या काटेकणगाना म्हापसा व अन्य बाजारात मोठ्या प्रमाणात मागणी आहे.पावसाळ्यापूर्वी माळरानावर किंवा पाण्याचा निचरा होणाऱ्या शेतजमिनीत वाफे तयार करून काटे कणगाची लागवड केली जाते.

वेली तयार झाल्यानंतर त्यांना काठीचा आधार दिला जातो.सुमारे सहा महिन्यांत काटेकणगाची काढणी केली जाते.मशागत व मेहनत कमी असल्याने शेती (Agriculture) बरोबरच या पिकाकडे शेतकऱ्याचा कल वाढत आहे.