मडगाव: गांजा तस्‍करी प्रकरणात कुडचडे पोलिसांकडून तिसऱ्या संशयिताला अटक केली असून त्‍याला तीन दिवसांची पोलिस कोठडी न्यायालयाकडून सुनावण्यात आली आहे.

या संशयिताचे नाव रिचू महेंद्रन पिल्लई असे असून तो मडगाव येथे राहणारा आहे. ओडिशावरून आलेला अमलीपदार्थांची पार्सले घेउन त्याचे वाटप गोव्यात करण्याचे काम तो करायचा याची माहिती मिळाल्यावर त्याला अटक करण्यात आलेली आहे.

काही दिवसांपूर्वी कुडचडे रेल्वे स्थानकाबाहेर संशयास्पदरीत्या फिरणाऱ्या अजित जेना याला गांजासह अटक केल्यानंतर मुख्य पुरवठा करणारा संशयित अक्षय बिसवाल याला ओडिशातून अटक करण्यात आली होती. आता या रॅकेटमधील तिसरा संशयित व माल वाटप करणाऱ्या रिचू महेंद्रन पिल्लई (३३, रा. आके मडगाव) याला अटक करण्यात आली आहे.

कुडचडे पोलिसांनी ५ सप्टेंबर रोजी रात्री साडेआठ वाजण्याच्या सुमारास कुडचडे रेल्वेस्थानकाबाहेर संशयास्पदरीत्या फिरणाऱ्या संशयित अजित कुमार जेना (मूळ रा. कुबेरा, ओडिशा) याला ताब्यात घेतले. त्याची झाडाझडती घेण्यात आली असता संशयिताकडील दोन बॅगेतून ८.४७२ किलो गांजा जप्त करण्यात आला. याची बाजारभावानुसार किंमत ८.४७ लाख रुपये इतकी आहे.

अजित जेना याच्या चौकशीतून संशयिताने यापूर्वी चारवेळा गोव्यात गांजा पुरवठा केलेला असून ओडिशातील एक व्यक्ती त्याला गांजा पुरवठा करत असल्याचे सांगितले. संशयित जेना याची न्यायालयाकडून अटीशर्तीवर जामीन मंजूर करण्यात आलेला आहे.

५० हजारांचा जातमुचलका व तेवढ्याच किमतीचा हमीदार, वास्तव्याचा पत्ता, संपर्काचा नंबर देणे परवानगीशिवाय गोवा सोडून न जाणे अशा अटी घातल्या आहेत. त्यानंतर पोलिसांनी संशयित जेना याने दिलेल्या माहितीच्या आधारे अक्षय कुमार बिसवाल (३८, रा. भद्रक, ओडिशा) याला ओडिशातून ताब्यात घेत त्यानंतर अटक केली.

मानवी साखळीद्वारे तस्‍करी

संशयिताला या गांजा पुरवठा करणाऱ्या रॅकेटचा पर्दाफाश झाल्याने ओडिशातून गोव्यात अमलीपदार्थ मानवी साखळीद्वारे रेल्वेतून होत असल्याचे उघड झालेले आहे. या प्रकरणी

दक्षिण गोवा पोलिस अधीक्षक सुनीता सावंत यांच्या मार्गदर्शनाखाली कुडचडे पोलिसांकडून आणखीही सखोल तपास केला जात आहे.

गांजा आणण्यात हात

संशयित अक्षय कुमार हाच ओडिशातून गोव्यात मानवी साखळीद्वारे गांजा गोव्यात आणत असल्याचे पोलिस तपासात झघड झाले आहे. संशयित अक्षय कुमार न्यायालयात हजर केले असता पाच दिवसांची कोठडी सुनावण्यात आलेली होती. पुढील तपास कुडचडे पोलिस करीत आहेत.