म्हापसा: म्हापसा (Mapusa) शहर, फेअर आल्त व पर्रा या ठिकाणी रस्त्याच्या कडेला पार्क केलेल्या 10 कारगाड्या (Car) फोडून अज्ञात चोरट्यांनी त्यातील सहा लाख रुपये किमतीचे कार स्टीरिओ लंपास केल्याचे म्हापसा पोलिसांनी सांगितले. चोरट्यांनी सर्व गाड्यांची नासधूसही केली आहे. ही चोरी गुरुवारी 19 रोजी रात्री ते शुक्रवारी 20 रोजी पहाटेच्या दरम्यान घडली असावी, असा अंदाज व्यक्त केला जात आहे.

या घटनेत या चोरीसंदर्भात फेअर आल्त येथील लिओ सिमॉईस, पर्रा येथील मवीन ब्रिटो व म्हापसा येथील संतोष प्रभू धारवाडकर यांनी म्हापसा पोलिसांत तक्रार सादर केली आहे. चोरट्यांनी फेअर आल्त भागात पाच गाड्या फोडल्या असून, सिमॉईस यांची जीए 03 व्हाय 9451 क्रमांकाच्या टोयोटा कारमधील 45 हजारांचा स्टीरिओ चोरला. तसेच, हर्षल दळवी यांच्या जीए 03, वाय 6937 क्रमांकाच्या आय टेन कारमधील सुमारे 50 हजार किमतीचा स्टीरिओ लंपास केला.

रमिता गावस यांच्या जीए 03, झेड 3351 क्रमांकाच्या किया सोनेट कारमधील 45 हजारांचा स्टीरिओ, मायरा डिकॉस्ता यांच्या जीए 03 झेड 1408 क्रमांकाच्या मारुती इग्नीझ कारमधील 50 हजारांचा स्टीरियो, तर प्रकाश केनावडेकर यांच्या जीए03 झेड 2400 क्रमांकाच्या क्रेटा कारमधील स्टीरिओ, मोबाइल व इतर सामान मिळून 1 लाख 82 हजारांचा ऐवज लंपास केला.