Goa Theft Case:

पावभाजी खाण्यासाठी खिशात पैसे नसल्यामुळे दीड लाखाचा आयफोन कोणी दुकानदाराला देईल काय? पण ही अशक्य कोटीतील गोष्ट आपल्या राज्यातच घडली आहे. दिल्लीतील एका पर्यटकाने हा आपला अनुभव ‘ट्विटर’वर शेअर केल्यामुळे तो सर्वांसमोर आला आहे.

दिल्लीतील कार्तिकेय राय हे गोव्यात पर्यटक म्हणून आले होते. जीवाचा गोवा करताना ते किंचित मद्याच्या अमलाखालीही गेले होते. तेथेच वावरणाऱ्या अन्य एका मद्यधुंद माणसाने त्यांच्या दीड लाख रुपयांच्या आयफोनवर हात साफ केला. राय यांना आपला आयफोन चोरीला गेल्याचे नंतर समजले. आयफोनची बॅटरी उतरल्यामुळे ते त्या आयफोनशी संपर्क साधू शकले नव्हते.

पैसे नव्हते, म्हणून दिला आयफोन

आयफोन चोरलेल्या व्यक्तीने घटनास्थळावरून काही किलोमीटर अंतरावरील पावभाजी विक्रेत्याकडे तो आयफोन पावभाजीच्या बदल्यात दिला. कारण त्याच्याकडे पावभाजी खाण्यासाठी पैसे नव्हते. त्या पावभाजी विक्रेत्याने आयफोन आपल्याकडे ठेवून घेतला आणि त्याला पावभाजी दिली. नंतर पावभाजी विक्रेत्याने त्या आयफोनची बॅटरी चार्ज केली. इकडे राय हे आयफोन चोरीला गेल्यामुळे हवालदिल झाले होते.

36 तासांनंतर झाला संपर्क

राय यांचा त्या आयफोनशी तब्बल 36 तासांनंतर संपर्क झाला. पावभाजी विक्रेत्याने एका अज्ञात व्यक्तीने तो आपल्याकडे पावभाजीच्या बदल्यात दिल्याचे कबूल केले. तो आयफोन परत करण्याचेही विक्रेत्याने मान्य केले. राय त्या पावभाजी विक्रेत्याकडे गेले आणि त्यांनी अखेर आयफोन ताब्यात घेतला. ‘गोव्यात असा अनोखा अनुभव मला आला’, असे म्हणत त्यांनी ही चित्तरंजक कथा ‘ट्विटर’वर शेअर केली आहे.