पणजी: गोवा टुरिस्ट टॅक्सीमालक संघटनेने आज पर्यटन भवन येथे मोर्चा नेऊन काल निवडणूक आयोगासाठी महाराष्ट्रातून टॅक्सी भाड्याने आणल्याच्या घटनेचा निषेध केला. यावेळी संघटनेचे चेतन कामत म्हणाले, की गोव्यातील (Goa) टॅक्सीमालकांच्या गाड्या न घेता महाराष्ट्र येथील गाड्या सरकारने घेतल्या आहेत त्याला आमचा विरोध आहे.

सर्व गोवेकरांना माहित आहे की कोविडच्या काळात टॅक्सीचालकांचे काय हाल झाले होते. कोविडमुळे आमच्या अनेक टॅक्सीचालकांना प्राण गमवावे लागले. त्यांच्या कुटुंबियांची अवस्था बिकट आहे. असे असताना गोव्यातील टॅक्सीचालकांना मनाई करून महाराष्ट्रातील (Maharashtra) टॅक्सी आणल्या जात आहेत. आम्ही कमी पैशामध्ये देखील काम करायला तयार आहोत.