राज्यातील सरपंचांना महिन्याला ८ हजार रुपये, उपसरपंचांना महिन्याला ६ हजार ५०० रुपये तर पंचांना महिन्याला ५ हजार ५०० रुपये मानधन मिळणार आहे. त्यांच्या मानधनात सरासरी दोन हजार रुपये वाढ करण्याचा निर्णय मंत्रिमंडळाच्या बैठकीत घेण्यात आला.

मुख्यमंत्री डॉ. प्रमोद सावंत यांनी मंत्रालयात ही माहिती दिली. यावेळी त्यांच्यासोबत पर्यटनमंत्री रोहन खंवटे उपस्थित होते. सरकारच्या या निर्णयामुळे सरकारवर या मानधनांचा वार्षिक २ कोटी ६३ लाख रुपयांचा अतिरिक्त बोजा पडेल.

मुख्यमंत्र्यांनी यावेळी सांगितले, की राज्यातील ११ औद्योगिक प्रशिक्षण संस्थांचा दर्जा वाढवण्याचे काम टाटा समूहाच्या आर्थिक सहकार्याने २३० कोटी रुपये खर्चून सरकारने मार्गी लावले आहे. यातील १६० कोटी रुपये टाटा खर्च करणार असून सध्या उपकरणे पुरवण्याच्या स्वरूपात त्यांनी ७५ कोटी रुपये खर्चही केले आहेत. औद्योगिक प्रशिक्षण संस्थांत केवळ नवीन उपकरणे आणली जाणार नसून अभ्यासक्रमांचीही फेररचना होणार आहे. सरकार ७० कोटी रुपये खर्चून या संस्था सुसज्ज बनविणार आहे

विद्यार्थ्यांचा होणार सन्मान

आतिथ्यशीलता अभ्यासक्रमासाठी ताज समूहाबरोबर करार करण्यात आला असून नवीन अभ्यासक्रम १५ जुलैपासून सुरू होत आहे. गुरुवार, ११ जुलै रोजी ‘जागतिक कुशलता दिना’निमित्त कला अकादमीत खास कार्यक्रम होणार आहे. या कार्यक्रमात कुशलता अभ्यासक्रमात चमकदार कामगिरी करणाऱ्या विद्यार्थ्यांचा सन्मान होणार असल्याची माहितीही मुख्यमंत्र्यांनी दिली.