गोव्यात 4 व 5 मे रोजी SCOच्या बैठकीच्या तयारीला वेग आला आहे. बाणावलीत ही बैठक होणार आहे. यात SCO संघटनेतील विदेशी मंत्री सहभागी होणार आहेत. या पार्श्वभूमीवर आज या बैठकीसाठीचे सचीव, नोडल शिष्टाचार अधिकारी संजीत रॉड्रिग्स यांनी पाहणी केली. दाभोळी विमानतळ ते बाणावली पर्यंतच्या रस्त्यांची वेगवेगळ्या खात्यांच्या अधिकाऱ्यांच्या उपस्थितीत त्यांनी पाहणी केली.

यावेळी रॉड्रिग्स यांनी संबंधीत खात्यांच्या अधिकाऱ्यांना सुचना केल्या. आरटीओ, पीडब्ल्यूडी, डीआय कलेक्टर, पोलीस, वीज आणि इतर संबंधित विभागाचे अधिकारी उपस्थित होते.

संजीत रॉड्रिग्स यांनी पत्रकारांना सांगितले की, "आम्ही संबंधीत खात्याच्या अधिकाऱ्यांना सुचना केल्या आहेत. येत्या दोन दिवसांमध्ये रस्त्यावरील सर्व अडथळे दूर करण्यात येतील. वाहतुक समस्या असली तरी त्या दृष्टिने सर्व काळजी घेण्यात येत आहे" असे सांगितले.

विदेशी मंत्र्यांच्या शांघाय सहकार्य संघटनेच्या बैठकीला भारताचे विदेशमंत्री एस जयशंकर, चीनचे विदेशमंत्री क्वीन गॅंग, रशियन विदेशमंत्री सर्जी लावरोव उपस्थित राहणार आहेत. 4 व 5 मे रोजी ही बैठक होणार आहे.

बैठकीत 8 देशांचे विदेशमंत्री सहभागी होणार आहेत आणि यामध्ये रशिया, पाकिस्तान आणि चीन या राष्ट्रांच्या विदेशमंत्र्यांचाही सहभाग आहे. या पार्श्वभूमीवर सुरक्षेच्या दृष्टीने सर्व सिद्धताही केली जात आहे.