MLA Venzy Viegas: म्हादई अभयारण्यात वाघासाठी संरक्षित क्षेत्र आखावे, अशी मागणी गत अधिवेशनात केली होती. या सरकारला ते करता आले नाही. त्यामुळेच सरकारनेच हे षडयंत्र रचले आहे, असा आरोप बाणावली येथील आम आदमी पक्षाचे आमदार वेन्झी व्हिएगस यांनी केला आहे.

तापमानात वाढ होत आहे. त्याचा फायदा घेऊन म्हादईच्या विषयावरून दुसरीकडे लक्ष वळविण्यासाठी सरकारच या आगी लावत असल्याचा संशय आमदार व्हिएगस यांनी व्यक्त केला आहे.

वाघांसाठी संरक्षित क्षेत्र करण्यासाठी सीमा आखावी, अशी मागणी मी केली होती. वाघांसाठी संरक्षित क्षेत्र करण्याचे सोडाच पण या आगींमुळे तेथे असलेले वाघही गेले असतील. आणि त्यासाठीच या आगी मुद्दाम लावल्याचा संशय आहे.

या आगी मुद्दाम लावल्या असतील तर त्या कुणी लावल्या. भाजप सरकारनेच या आगी लावल्या आहेत का? असा सवालही त्यांनी केला. कारण भाजप सरकारला व्याघ्र प्रकल्पासाठी सीमा आखता आलेली नाही, असे आमदार व्हिएगस यांनी म्हटले आहे.