(Passengers Angry on Kadamba At Margao Bus Stand) मडगाव बसस्थानकात पणजीकडे जाणारी बस न आल्याने प्रवासी ताटकळले. तब्बल दीड तास मडगाव ते पणजी बसच नसल्याने प्रवाशांना विनाकारण मानसिक त्रास झाला. गुरूवारी रात्री आठच्या सुमारास हा प्रकार घडला. कदंबा महामंडळ प्रशासनाच्या या गैरव्यवस्थापनावर या प्रवाशांनी तीव्र नाराजी व्यक्त केली.

विशेष म्हणजे कदंबा महामंडळ प्रशासनाला याचे काहीही सोयरसूतक नव्हते. प्रवाशांच्या या गैरसोयीबद्दल कदंबा प्रशासनाला समाधानकारक उत्तर देता आले नाही. दीड तास वाट पाहून वैतागलेल्या प्रवाशांनी जेव्हा प्रशासनाकडे विचारणा केली, तेव्हा पणजीहून बस आल्यानंतर ती बस सोडली जाईल, असे सांगण्यात आले.

अनेक चाकरमानी कार्यालयीन कामकाज संपवून घरी जाण्यासाठी बसची वाट पाहत होते. काही जणांनी ही नेहमीची घरी जाण्याची वेळ होती. या प्रवाशांमध्ये महिला आणि मुलींची संख्याही मोठी होती. जवळपास 70 हून अधिक प्रवासी मडगाव बसस्थानकात कदंबाच्या पणजीला जाणाऱ्या बसची ताटकळत वाट पाहत होते. अनेकांनी राज्य सरकारच्या नावानेही खडे फोडले. जवळपास दीड ते पावणेदोन तास हे प्रवासी पणजी बसची वाट पाहत होते. संतप्त झालेल्या प्रवाशांमुळे येथे काही काळ तणावाचे वातावरण निर्माण झाले होते.