पणजी: कोलकाता येथे महिला डॉक्टरवर बलात्कार करून तिची हत्या केल्याने देशभरात डॉक्टरांनी आरोपीला शिक्षा व्हावी यासाठी संप केला होता. गोव्यातही त्याचे पडसाद उमटले होते. गोवा वैद्यकीय महाविद्यालयातील स्थानिक डॉक्टरांनी संप केला होता.

या घटनेच्या पार्श्वभूमीवर गोमेकॉने डॉक्टरांच्या सुरक्षिततेसाठी विशेष टास्क फोर्सची स्थापना केल्याची माहिती गोमेकॉचे डीन डॉ. शिवानंद बांदेकर यांनी दिली आहे.

दरम्यान, विश्‍वजीत राणे यांनी टास्क फोर्सची स्थापना करणारे गोवा हे पहिले राज्य असल्याची माहिती दिली आहे.

काही दिवसांपूर्वी गोमेकॉतील स्थानिक डॉक्टरांनी बलात्कार आणि हत्याप्रकरणातील आरोपीला शिक्षा व्हावी यासाठी संपही पुकारला होता. ज्याचा परिणाम नियोजित शास्त्रक्रियांवरदेखील झाला होता. या डॉक्टरांच्या विविध मागण्या होत्या.

आरोग्यमंत्री विश्वजीत राणे यांनी मध्यस्थी केल्यानंतर संप मागे घेण्यात आला होता. यामध्ये डॉक्टरांची सुरक्षा हा मुद्दादेखील होता. डॉक्टरांची सुरक्षा प्रथम आणि वैद्यकिय व्यावसायिकांच्या कल्याणासाठी आम्ही काम करत आहोत, हे सिद्ध करणारा निर्णय गोवा वैद्यकीय महाविद्यालयाने घेतला आहे.