Goa BJP लोकसभेच्या 2024 मध्ये होणाऱ्या निवडणुकीमध्ये गोव्यातील दोन्हीही जागा जिंकण्याचे लक्ष्य भाजपने ठेवले असून यासाठी केंद्रीय गृहमंत्री अमित शहा 16 एप्रिल रोजी गोव्यात येत आहेत.

दुपारी 4 वाजता त्यांची फर्मागुढी येथील अभियांत्रिकी महाविद्यालयाच्या मैदानावर जाहीर सभा होत आहे. या सभेला 25 हजार कार्यकर्ते उपस्थित असतील, अशी माहिती प्रदेशाध्यक्ष सदानंद शेट तानावडे यांनी दिली आहे.

तानावडे म्हणाले, लोकसभा निवडणुकांसाठी अद्यापही वेळ असला, तरी पक्षाच्या केंद्रीय कमिटीने तयारी सुरू केली आहे. राज्यात बहुतांश मतदारसंघात आणि बूथ व शक्ती केंद्र स्तरावर कार्यकर्त्यांचे नेटवर्क उभारण्यात आले आहे.

आज पक्षाकडे डॉ. प्रमोद सावंत यांच्या नेतृत्वाखाली सरकार, ३३ आमदार, दोन खासदार आहेत. याच्या आधारावर भाजप लोकसभेच्या दोन्ही जागा सहज जिंकेल. मात्र, आम्ही आतापासून तयारी सुरू केली आहे.

अमित शहा सकाळी महाराष्ट्राचा दौरा संपून दुपारी राज्यात दाखल होतील. फार्मागुढी येथील सभा संपल्यानंतर ते पक्षाचे कार्यकारिणी, मंत्री, आमदार आणि मंडल अध्यक्ष व सचिव यांना मार्गदर्शन करतील.

भाजपने कसली कंबर

केंद्रीयमंत्री अमित शहा यांची सभा यशस्वी करण्यासाठी भाजपने कंबर कसली असून प्रदेशाध्यक्ष तानावडे यांनी आज दक्षिण गोव्यातील बहुतांश तालुक्यांसाठीच्या तयारीच्या सभा घेतल्या.

यात वास्को - मुरगाव, मडगाव आणि फोंड्याच्या सभांचा समावेश आहे. या सर्व सभांना तालुका पातळीवरचे आणि मतदारसंघ स्तराचे कार्यकर्ते उपस्थित होते.

म्हादईबाबत तडजोड नाही

म्हादई हा आमच्या सरकारबरोबर राज्यातील जनतेच्या जीवन मरणाचा प्रश्न आहे. ती राज्याची जीवनदायिनी आहे. त्यामुळे आमच्या पक्षाचे मुख्यमंत्री, मंत्री, आमदार व कार्यकर्ते कर्नाटकातील भाजपच्या प्रचारासाठी गेले तरी आमच्या म्हादईबाबतच्या धोरणामध्ये कोणत्याच प्रकारचा बदल होणार नाही. किंवा याबाबत कोणतीच तडजोड केली जाणार नाही, असे तानावडे म्हणाले.