दिकरपाल-दवर्ली पंचायतीचा आदर्श ठेवून नावेली मतदारसंघातील इतर पंचायतींनी कचरा समस्येवर तोडगा काढण्यासाठी पावले उचलावीत, असे आवाहन नावेलीचे आमदार व कदंब महामंडळाचे चेअरमन उल्हास तुयेकर यांनी केले.

दवर्ली येथे टाकाऊ साहित्य वर्गीकरण शेडच्या (एमआरएफ) पायाभरणीवेळी ते बोलत होते. यावेळी दवर्लीचे जिल्हा पंचायत सदस्य परेश नाईक, दिकरपाल-दवर्लीचे सरपंच हर्क्युलान नियासो, पंच संपदा नाईक, विद्याधर आर्लेकर, साईश राजाध्यक्ष, फा. डाॅमनिक नोरोन्हा व ग्रामस्थ उपस्थित होते.

कचरा समस्या सगळीकडे भेडसावत आहे. रस्त्याच्या बाजूला कचरा फेकण्याचे प्रकार घडत असल्याने जागोजागी उकिरडे निर्माण झाले आहेत. कचऱ्याची समस्या उग्र होत असल्याचे दिसून येत असताना दिकरपाल-दवर्ली पंचायतीने एमआरएफ शेड उभारण्यासाठी सुरू केलेली प्रक्रिया स्तुत्य आहे. या पंचायतीला कचरा व्यवस्थापनासाठी सरकारकडून आवश्यक असलेले सहकार्य मिळवून देण्यास आपण कटिबद्ध आहे. - उल्हास तुयेकर, आमदार