सासष्टी : चांदर येथे रेल्वेच्या दुपदरीकरणास विरोध करणाऱ्या आंदोलकांनी रस्ता काही वेळ अडवला म्हणून कोकण रेल्वेने या आंदोलकांवर खटला दाखल केला आहे. हा खटला मडगावच्या सत्र न्यायालयात चालू असून पुढील महिन्यात त्याची सुनावणी सुरु होणार आहे. या आंदोलकांबद्दल आपल्याला सहानुभूती आहे,असे केंद्रीय पर्यावरण आणि बंदर राज्यमंत्री श्रीपाद नाईक यांनी सोमवारी येथे पत्रकारांशी बोलताना सांगितले.

मंत्री नाईक म्हणाले की रेल्वेचे दुपदरीकरण हे स्थानिकांना त्रास करण्यासाठी मुळीच नाही. दुपदरीकरणामुळे रेल्वेच्या व गोव्याच्या विकासात भर पडेल. मुरगाव बंदराचा दर्जाही वाढेल. तसेच पर्यावरणाला कसलीही बाधा पोहोचणार नाही या कडे सरकार संपूर्ण लक्ष देईल. आपल्याला या आंदोलकांबद्दल सहानभुती आहे. त्याबद्दल काय योग्य तो मार्ग काढू शकू त्याबद्दल जरुर विचार करू, असेही नाईक म्हणाले.

केंद्र सरकारने अग्नीपथ ही सेनादलात नोकरीसाठी जी नवीन योजना सुरु केली आहे. ती अत्यंत स्तुत्य अशीच आहे. मात्र काही जणांमध्ये गैरसमज झाला आहे. हा गैरसमज दूर करण्यासाठी केंद्र सरकार खुलेपणे चर्चा करण्यास तयार आहे. तसेच सरकार त्यावर काहीतरी निश्‍चितच तोडगा काढेल, असा विश्र्वासही नाईक यांनी व्यक्त केला. हल्लीच सेनादलात भरती होण्यासाठी काही जणांच्या मुलाखती वगैरे झाल्या होत्या. त्यांच्यात हा गैरसमज जास्त प्रमाणात पसरलेला आहे. सरकार त्यातून काहीतरी मार्ग काढेल, असेही नाईक यांनी स्पष्ट केले.