Goa Cricket Association Declare Goa T20 Team: ‘पाहुणा’ क्रिकेटपटू कृष्णमूर्ती सिद्धार्थ गोव्यासाठी आगामी २०२३-२४ मधील देशांतर्गत क्रिकेट मोसमातील झटपट क्रिकेट स्पर्धेत गोव्यासाठी दुहेरी जबाबदारी निभावणार आहे.

प्रमुख फलंदाज या नात्याने त्याच्यावर मदार असेलच, त्याचवेळी संघात समतोल साधण्याच्या उद्देशाने तो टी-२० आणि एकदिवसीय सामन्यांच्या स्पर्धेत यष्टिरक्षणही करेल, अशी माहिती गोवा क्रिकेट असोसिएशनचे (जीसीए) सचिव रोहन गावस देसाई यांनी सोमवारी दिली.

मोहीम १६ ऑक्टोबरपासून

यावेळच्या सय्यद मुश्ताक अली करंडक टी-२० क्रिकेट स्पर्धेत गोव्याचा समावेश ‘क’ गटात आहे. स्पर्धा १६ ते २७ ऑक्टोबर या कालावधीत झारखंडमधील रांची येथे खेळली जाईल. अनुक्रमे आंध्र, मणिपूर, गुजरात, अरुणाचल प्रदेश, रेल्वे, पंजाब, सौराष्ट्र या संघांविरुद्ध गोव्याचे सामने होतील.

संघातील अनुभवी अष्टपैलू दर्शन मिसाळ याच्याकडे नेतृत्व कायम ठेवण्यात आले आहे. १६ सदस्यीय संघ आणि चार राखीव खेळाडू टी-२० स्पर्धेपूर्वी राजस्थानमधील जयपूर येथे सराव करतील आणि तेथून संघ रांची येथे रवाना होईल. त्यासाठी संघाला सोमवारी शुभेच्छा देण्यात आल्या.

संघातील महाराष्ट्राचा ‘पाहुणा’ खेळाडू राहुल त्रिपाठी सध्या चीनमधील हांग् चौऊ येथे सुरू असलेल्या आशियाई क्रीडा स्पर्धेतील भारताच्या पुरुष क्रिकेट संघाचा सदस्य आहे. ती स्पर्धा संपल्यानंतर तो थेट गोव्याच्या संघात दाखल होईल.

गोव्याचा टी-20 संघ

ईशान गडेकर, राहुल त्रिपाठी, कृष्णमूर्ती सिद्धार्थ, सुयश प्रभुदेसाई, दर्शन मिसाळ (कर्णधार), दीपराज गावकर (उपकर्णधार), तुनीष सावकार, मोहित रेडकर, अर्जुन तेंडुलकर, लक्षय गर्ग, शुभम तारी, विकास सिंग, कश्यप बखले, राजशेखर हरिकांत, स्नेहल कवठणकर, फेलिक्स आलेमाव, राखीव: विजेश प्रभुदेसाई, हेरंब परब, शुभम देसाई, कीथ पिंटो.