Goa News: आपल्याच टेलिपॉवर कंपनीच्या गोदामामधून अनेक प्रसंगी जुन्या टॉवरच्या तब्बल 224 बॅटऱ्या चोरल्याप्रकरणी साळगाव पोलिसांनी याच कंपनीच्या सुपरवायझरला अटक केली. हा चोरीचा मुद्देमाल 3 लाख रुपये किमतीचा आहे. रघुनाथ तुकाराम पोवार (32, रा. थिवी व मूळ कागल-कोल्हापूर) असे अटक केलेल्या संशयिताचे नाव आहे.

साळगाव पोलिसांनी दिलेल्या माहितीनुसार, या चोरीचा प्रकार हा नोव्हेंबर 2022 ते 20 जानेवारी 2023च्या दरम्यान घडलेला. संशयित रघुनाथ हा ‘डिमेलो टेलिपॉवर प्रा.लि.’ या साळगावमधील स्थित कंपनीत सुपरवायझर म्हणून कामास होता.

याप्रकरणी कंपनीचे ऑपरेशनल मॅनेजर शंशाक रोडे हे तक्रारदार आहेत. या तक्रारीनुसार साळगाव पोलिसांनी शोधमोहीम राबवत संशयितास थिवीमधून ताब्यात घेत भादंसंच्या कलम 381अन्वये त्याला अटक केली.

संशयिताने आपल्या चोरीची कबुली दिली असून त्यास न्यायालयाने चार दिवसांची पोलिस कोठडी सुनावली आहे.

साळगाव पोलिस स्थानकाचे निरीक्षक मिलिंद भुईंबर यांच्या मार्गदर्शनाखाली साहाय्यक पोलिस उपनिरीक्षक अनिल केरकर, कॉन्स्टेबल विजय पाळणी, सर्वेश गावस, राहुल आगोळकर, निखिल नाईक यांनी संशयिताचा शोध घेत त्यास अटक केली. साळगाव पोलिस पुढील तपास करीत आहेत.