पणजी : काँग्रेसला 2017 च्या विधानसभा निवडणुकीत आमदारांच्या पक्षांतरामुळे मोठा फटका बसला होता. मात्र या पक्षांतराचा फटका बसलेल्या काँग्रेसने यावेळी निवडणुकीआधीच त्याचा बंदोबस्त करायचं ठरवलं आहे. काँग्रेसच्या उमेदवारांना कायदेशीर मार्गानेच आमदारकी न सोडणे बंधनकारक केलं जाणार आहे. काँग्रेसच्या पदाधिकाऱ्यांनी आमदारांवरील निर्बंधांचे स्पष्ट संकेत दिले आहेत, मात्र त्यांनी हे निर्बंध कोणते असतील यावर भाष्य करणं मात्र टाळलं आहे. (Sunil Kauthankar Congress MLA News Updates)

गोवा काँग्रेसचे (Congress) मुख्य प्रवक्ते सुनील कौठणकर यांनी साम वृत्तवाहिनीशी बोलताना काँग्रेसच्या आमदारांबाबच्या नव्या नियमांची माहिती दिली आहे. यावेळी काँग्रेसने गोवा विधानसभा निवडणुकीसाठी दिलेले उमेदवार पक्षाशी बंडखोरी करणार नाहीत अशी आम्हाला खात्री आहे. पण तरीही प्रतिबंधात्मक उपाय म्हणून काँग्रेस आपल्या निवडून आलेल्या आमदारांना (MLA) कायदेशीर बाबींच्या माध्यमातून पक्षासोबत बांधून ठेवणार असल्याचं कौठणकर यांनी स्पष्ट केलं आहे. दरम्यान कोणत्या प्रकारच्या कायदेशीर बंधनं असतील यावर त्यांनी बोलणं टाळलं.

जर एखाद्या आमदाराने निवडून आल्यानंतर पक्षांतर केल्यास त्याला लोकांना त्याचं उत्तर द्यावं लागणार, असंही त्यांनी पुढे म्हटलं आहे. दरम्यान राष्ट्रवादीसोबत (NCP) महाराष्ट्रात युती असली तरीही गोव्यात काँग्रेसची फक्त गोवा फॉरवर्डसोबत युती आहे. त्यामुळे आघाडीचा निर्णय हा पक्षश्रेष्ठीच घेतील असंही कवठणकर यांनी स्पष्ट केलं. दरम्यान ज्या पक्षाचा गोव्याशी दूरदूरपर्यंत संबंध नाही, अशा तृणमूल पक्षाशी गोव्यात युती कशी करणार, असा प्रश्नही त्यांनी केला आहे.